Jens-Frederik siulittaasuni nikinneq pillugu: Annilaanganngilanga
Demokraatit qanimut naalakkersuisoqataanni Siumumi aqutsisunik allannguisoqarpoq. Siumup Naalakkersuisunut siulittaasoq aamma taarsissallugu kissaateqarunik, nutaamik naalakkersuisoqatigiinnermut isumaqatigiissusiortoqartariaqarpoq, partiimi siulittaasoq Jens-Frederik Nielsen oqarpoq.
Demokraatini siulittaasup, Jens-Frederik Nielsenip, Erik Jensen Siumumi siulittaasunngornerani pilluaqquaa.
Tamatuma saniatigut Jens-Frederik Nielsenip pisut utaqqivai:
- Naalakkersuisoqatigiinnermut isumaqatigiissut malillugu naalakkersuisoqarnerput oqaatigiinnassavara. Taanna malippara, siulittaasullu nutaap aamma malikkaa naatsorsuutigaara. Oqaluuserisassatsinnik allanik pilersaaruteqarsimanngikkuni, Jens-Frederik Nielsen oqarpoq.
Siumut naalakkersuisoqatigiinnermut isumaqatigiissummi allannguuteqartoqarnissaanik kissaateqassaguni, nutaamik isumaqatiginninniartoqartariaqartoq, partiimi siulittaasup naqissuserpaa, Demokraatillu taamaaliorusussinnaapput.
Naleqquttorsiortut
- Naleqquttorsiortumik periuseqarpugut. Sapinngisaq tamaat talerperliunissaq soorunami ujartorparput, kisianni isumaqatigiuminaatsuunngilanga, Jens-Frederik Nielsen oqarpoq.
- Taanna (Erik Jensen, aaqq.) isumaqatigiissummik nutaamik kissaateqarpat, isumaqatiginninniartariaqarpugut, partiimi siulittaasoq nangilluni oqarpoq.
Siumullu Naalakkersuisut siulittaasuannik maanna Siumumi siulittaasuusimasumit Kim Kielsenimit atorfigineqartumik taarsiiniarluni kissaateqaruni isumaqatiginninniartoqartariaqarpoq.
Isumaqatigeereernissamik pisariaqartitsisoq
- Siumut siulittaasumik taarsiinissamik qinnuiginnippat, oqaloqatigiissutigeqqaarnissaa aalajangiusimavarput. Sioqqutsilluta tamatta naammagisimaakkatsinnik isumaqatigiissuteqarsimagutta, siulittaasup taarserneqarnissaanut piareersimassaanga.
- Maanna isumaqatigiissutaasumi siuttuusoq allanngortinniaraanni, taava soorunami aamma nutaamik isumaqatigiissusiortoqartariaqarpoq, Jens-Frederik Nielsen oqarpoq.
Siumut talerperliunerujunnaarluni nunatsinni politikkimi qeqqanut nikinnerunissaa kissaatigalugu, Siumumi siulittaasup nutaap Erik Jensenip siornatigut oqaatiginikuuaa.
Siumut tatigigaa
Jens-Frederik Nielsenilli naalakkersuisoqatigiit avissaariasaarnissaat annilaangassutiginnginnerarpaa:
- Annilaanganngilanga. Maanna suleqatitta allanngortoqassappat uagutsinnut nalunaarutigiumaaraat tatigaara. Avaqqunneqarnissarput ilimaginngilara. Erik Jensenip siulittaasumut qineqqusaarnermi tamanna aamma oqariartuutiginngilaa. Akerlianik suleqatiginninnissaq oqariartuutigaa, tamannalu qilanaarivara, Jens-Frederik Nielsen oqarpoq.