Jens-Frederik Pelep nalunaarutaa pillugu: Sovjetunionimiinngilagut
Illuatungiliuttutut partiiusut marluk, Demokraatit Siumiulu, innuttaasut avissaartuutsikkusunnagillu namminersulivinnissaq pillugu taasisoqarneratigut assigiinngitsumik pisinnaatitaaffeqartitserusunngillat.
Nunanut allanut naalakkersuisup Pele Brobergip (N) danskit aviisiannit Berlingskemit apersorneqarluni oqaatigaa, Nunatta namminersulivinnissaa pillugu kikkut oqallinnermut peqataasinnaasariaqarlutillu taasisinnaatitaasariaqarnersut pillugit oqallittoqartariaqartoq.
Pele Brobergip apersorneqarnermini oqaatigaa, inuit taakkulu kinguaavit kisimik oqaaseqarsinnaallutillu taasisinnaatitaasariaqartut:
- Nunammi nunasiaateqarsimasut ingerlaannarusunnerlutik ingerlaannarusunnginnerlutilluunniit aalajangiisinnaatitaanissaat siunertarineqanngimmat, Brobergi aviisimut taamatut oqarsimavoq. Aamma ilanngullugu oqaatigisimavaa, kikkut tamarmik taasitinneqarlutillu immikkoortitsisoqassanngitsoq.
Illuatungiliuttulli partiianni, Demokraatini, siulittaasoq Jens-Frederik Nielsen immikkoortitsisoqannginnissaa pillugu erseqqilluinnartumik oqaaseqarpoq:
- Sovjetunionimiinngilagut. Nunami oqartussaaqataanermik tunngaveqartumi inuuvugut, aamma kikkut tamarmik inuiaqatigiinnut tapersiisartut taasisinnaatitaapput, partiimi siulittaasoq Berlingskemut oqarsimavoq.
Jensen: Immikkoortitsineq isumaqanngilaq
Siumumi siulittaasoqw Erik Jensen aamma immikkoortitserusunngilaq. Erik Jensenip aviisimut allakkatigut akissuteqarnermini oqaatigaa, Nunatsinni najugaqartut tamarmik kalaaliusut, taamaammallu innuttaasut avillugit assigiinngitsunik pisinnaatitaaffilersuineq isumaqanngitsoq.
Naalakkersuisut Siulittaasuat Múte B. Egede (IA) sapaatiummat ualikkut tusagassiorfinnut nalunaaruteqarluni Pele brobergip oqaaserisimasaanut naqqiissuteqarpoq:
- Nunatsinni innuttaasut tamarmik naligiimmik assigiimmillu pisinnaatitaaffeqarput, taakkulu Naalakkersuisut qaqugumulluunniit illersortuassavaat. Tamallu oqartussaaqataanerat qaqugumulluunniit illersorneqartuartariaqarpoq, Múte B. Egede opqarpoq.
Pele Brobergip Sermitsiaq.AG-mut oqaatigaa, namminersulivinnissamut kikkut taasisinnaatitaassanersut aalajangiiffigissallugu siunertarisimanngisaannarlugu.