Skip to main content

Jens-Frederik nunarsuarmi pitsaanerit 350-it akornaniilerusuppoq

Nunatsinni sulorallaqqinnerpaaq Jens-Frederik Nielsen Sloveniami unammeqataassaaq sapaatip akunnerata tulliani

Nunani tamalaani unammisartut Sloveniami unammilerpata Nuummit 28-nik ukiulik Jens-Frederik Nielsen unammeqataassaaq.

Sulorarnermi sisamariarluni Nunatsinni pissartaasareerpoq, GM-imi kingullermi aamma pissartanngorluni. Maanna nutaamik anguniagaqarpoq, tassami nunarsuarmi pitsaanerit 350-it akornaniinnilernissani siunniuppaa.

Nunani tamalaani unamminerit

Maanna 605-itut nunarsuarmi inissisimavoq, anguniakkani anguniaruniuk sukataartariaqarluni oqarpoq.

- Anguniagaq imaannaanngilaq, kisianni angunisinnaallugu qularinngilara. Maannakkut ineriartortorujussuuvunga, Nunatsinni pissartanngorniuttarnerit unammiffiginissaat naammakkunnaartoq misigaanga. Unamminerit amerlanerusut pisariaqartippakka, Bror Madsenip aamma Frederik Elsnerip unammisartuujunnaareernerisa kingorna misigaanga misilittaasariaqalerlunga. Taakku ilaatigut pissutaallutik maanna inissisimaffiga inissisimaffigaara. Ineriartoqqissaguma nunani allani unamminerusariaqarlunga misigaara - aamma unamminerit amerlanerusut peqataaffigerusuppakka, Jens-Frederik Nielsen Sermitsiaq.AG-mut oqaluttuarpoq.

Suliffeqarfinnut kajumissaarut

Sloveniamut angalanissaminut akissaqarumalluni suliffeqarfinnut assigiinngitsunut qinnuteqarpoq.

- Suliffeqarfinnut 40-nut allappunga - affaat qinnuteqaatikka akinngilaat, sinneri itigartitsillutik. Qujanartumik suliffeqarfik tapersersorpaanga, angalanissara taamaasilluni piviusunngortillugu. Suliffeqarfiit unammisartunut tapersersuisarnissaat pingaaruteqarluinnarpoq, kattuffiimmi akissaqartinngilaat angalanissat. Neriuutigaara suliffeqarfiit siunissami tapersersuinerulissasut, taamaasilluni unammisartut taskorluugaat piviusunngortalerniassammata, Jens-Frederik Nielsen kaammattuivoq.

Sisamanngorpat unammissaaq

- Sloveniami qanoq angusaqarnissat siunnerfigaajuk?

- Unammisaqattaarnerit oqitsuinnaanavianngillat, OL-imut maanna anngunniuffiuvoq, taamaattumik unammisartut tamarmik pointinik katersiniarsaripput. Kisianni pisinnaasakka tamarmik atorlugit unammeqataassaanga - pointinik katersissaanga aamma taanna saniatigut nunani allani unamminerni misilittagaqarnerulissallunga, akivoq.

Sloveniami unamminissanut Jens-Frederik Nielsen anngunniuteqqaartussaavoq. Schweizimeersoq Manuel Manca unammisussaavaa, taanna nunarsuarmi maanna 1459-itut inissisimagallarpoq. Sisamanngorpat tulliani unammissapput.

Jens-Frederik Nielsen Sloveniami unammeqataareeruni Danmarkimi pitsaanerit akornanni aamma unammeqataassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER