Jens-Frederik Nielsen: Sukkut akikinnerussapput
Jens-Frederik Nielsenip nunap aningaasaqarnera pillugu 14-inik apeqquteqarnermigut Aningaasaqarnermut Naalakkersuisoq Asii Chemnitz Narup (IA) sulisilersimavaa. Ulluinnarni inuuniarneq akikinnerulersinniarlugu pissusiviusut saqqummiunneqartariaqart, taanna isumaqarpoq.
Demokraatit siulittaasuata Jens-Frederik Nielsenip §37 naapertorlugu Naalakkersuisunut apeqqutigisimavaa, akitsuutinik assigiinngitsunik appaaneq aamma akileraarutinik appaaneq qanoq kinguneqassanersut.
Qineqqusaarnermi isumassarsiani taamaalilluni nangippaa. Apeqquterpassuit aalajangiiffigisassatut siunnersuusiornermik nassataqassapput, siulittaasup ukiakkut ataatsimiinnermi saqqummiunniagai, taanna oqaluttuarpoq.
- Uagut politikkeriusugut qineqqusaarutitsinnut atatillugu naliliiffigineqartarnissarput pingaaruteqarpoq, taamaammat qineqqusaarnermi saqqummiussimasakka akitsuutinik appaanissamut tunngassuteqartut pillugit siunnersuutinik tigussaasunik saqqummiussissamaarpunga, Jens-Frederik Nielsen Sermitsiaq.AG-mut oqarpoq.
- Innuttaasut ulluinnnarni inuuniarnerat akikingerusariaqarpoq, saqqummiussakkalu tamatumunnga atussallugit pitsaaqquteqartussaapput. Apeqqutigineqartut inuiaqatigiit akornanni sumiikkaluaraanniluunniit aamma qanorluunniit atugaqaraluaraanni tamanit atorneqartartuupput, Jens-Frederik Nielsen oqarpoq.
Akitsuutit appasinnerungaangata peqqiilliornerusoqalersartoq
Siulittaasup ilisimaarilluarpaa, sukkunut, mamakujunnut sukkulaanullu akitsuutit qaffanneqarnerannut parteertik akisussaaqataasoq, akitsuutilli atorunnaarsinneqarnissaannut piareeqqanerarpoq.
- Nalunngilara Demokraatit sukkunut akitsuutinik atuutsitsileqataasimasut, akitsuutilli assigiinngitsutigut eqquisimapput. Inuiaqatigiinni isertitakinnerpaasorpassuit eqqornerlunneqarsimapput. Sukkut kikkunnit tamanit atorneqartarput, taamaammat suliniutiginiakkama ilagaat, taanna oqarpoq.
Jens-Frederik Nielsenip §37 naapertorlugu apeqquteqarnermini ilaatigut imigassamut aalakoornartortalimmut tupamullu tunngassuteqartut paasisaqarfigisimavai. Akissuteqaatini atuarneqarsinnaavoq, sukkunut, imigassamut tupamullu akitsuutit apparneqarpata, peqqinnissaqarfimmi isumaginnittoqarfimmilu aningaasartuuteqarnerulertoqassasoq.
Cigaritsit aalakoornartortallillu akikillineqassanngitsut
Jens-Frederik Nielsenili imigassamut tupamullu akitsuutit appartinneqarnissaat atorunnaarsinneqavinnissaalluunniit pillugit siunnersuummik saqqummiussilersaanngilaq, taanna erseqqissaavoq.
- Pissutsit eqqortut paaserusussimavakka, akissutisiakkalu tamaasa nuannaarutigaakka. Akitsuutinilli appaasoqartuuppat allanut sunniutaasinnaasut arlalitsigut itisilerlugit naatsorsuisoqarsimanngilaq. Akileraarutit akitsuutillu allanut qanoq sunniuteqarsinnaanersut oqaluuserineqarnissaat pingaaruteqarpoq.
Naalakkersuisuutitaqarnissinni sooq tamakku isumagisimanngilisigit?
- Apeqqut akiuminaappoq. Taamatut ittunut atatillugit naatsorsuisoqarnissaanut immaqa piareersimasimanngilagut, tamanna misissorneqassaaq. Isumagineqartariaqarput, Jens-Frederik Nielsen erseqqissaavoq.
Tulliuttut akitsuutaannik appaanissaq pillugu aalajangiiffigisassatut siunnersuutissaq piareersarneqarpoq:
- Neqi
- Kaffi
- Tii
- Sukkut
- Ingerlatseqatigiiffiit akileraarutaannik appaanissaq