Jens-Frederik Nielsen: Sooq ingerlatsisut nutaat piujuartitsinngitsumik pisassiissutinik pissappat?
Avataasiorluni saarullinniarnermi ingerlatsisut nutaat ukioq manna Tunumi 7000 tonsinik pisassinneqartussanngornerat, Jens-Frederik Nielsenip (D) tupigusuutigaa. Taamaattumik §37 naapertorlugu apeqqutinik arlalinnik suliaq pillugu apeqquteqarpoq.
Naalakkersuisut 2023-mut saarullinnik pisassiinerannut atatillugu nalunaaruteqarnerat, Demokraatinit Inatsisartunut ilaasortap Jens-Frederik Nielsenip tupigusuutigaa.
Tassami ingerlatsisunut nutaanut marlunnut 7.515 tonsinik immikkoortitsisoqarpoq, taakku 31. marts tikillugu ilaatigut piginnittuunermut paasissutissanik, angallatit pillugit, aalisarnermut pilersaarutit, missingersuutinik saqqummiussinissamut periarfissinneqarput.
Qulaani allassimasut saniatigut aamma Kujataani imaluunniit Tunumi tunitsivinnut periarfissat maanna pioreersunut imaluunniit siunissami pilersinneqartussat pillugit pilersaarutinik saqqummiussaqarnissaq piumasaqaataavoq.
- Periuserineqartoq eqqumiigaara, pisassiissutigineqartuni takusinnaagakku ingerlatsisut pioreersut saarullinnut pisassiissutaat allanngoratilluunniit annikilleriarsimammata, Jens-Frederik Nielsen apeqquteqarnerminut tunngavilersuilluni allappoq.
Piffissaq eqqortuunngitsoq
Tamanna tunuliaqutigalugu saarullinniarnermi ingerlatsisunik nutaanik qaaqqusinissamut piffissaq eqqortuunngitsoq, taanna isumaqarpoq.
- Tamatumani naqissuserniarpara pisassiisoqassatillugu piumasaqaatini ingerlatsisunut nutaanut ukioq kaajallallugu piujuartitsinissaq aallaavigalugu aalisarnissamut qulakkeerinnissinnaanngikkaanni tunniussisoqannginnissaanik taamatullu ingerlatsereersut pisassiissutinik annertunerusunik pisariaqartitsisunut siullertut tunniunneqartussaanerat pisassiinissamut piumasaqaatinut ilaammata.
Naalakkersuisut periusaat Naalakkersuisut piumasaqaataannut uani suliami naapertuuppasinngitsut, taanna isumaqarpoq.
Tunup avataani saarullittassanut TAC-p 5.515 tonsinik qaffannerannut atatillugu pisassiissutinut aalisarnermi ingerlataqalerniartut nutaat qinnuteqarsimanerinut atatillugu aalisarnermi ingerlataqartunik nutaanik isertoqarsinnaaneranut periarfissaqarnersoq Naalakkersuisut nalilerusussimagaat, Naalakkersuisut akissuteqarnerminni ilisimatitsipput.
Suli aalajangiisoqanngitsoq
Ingerlatsisumut nutaamut pisassiissutinik tunniussinissaq pillugu suli aalajangiisoqanngitsoq, Naalakkersuisut oqarput, kisianni akuersissutit pisassiissutit pisassiissutillu pillugit nalunaarummi nr. 47, 18. december 2020-meersumi §12-mi aalajangersakkat tunngaviusut tunngavigalugit periarfissaqartitsisoqarpoq.
Ingerlatsisut nutaat marluk piginnittuini takuneqarsinnaavoq, ingerlatseqatigiiffinni marlunni piginnittut ilaat aalisarnermut ilaareerput.
Naalakkersuisulli akissummi allapput, ingerlatsisut nutaat tassaasut ”inuk ingerlatseqatigiiffilluunniit ukiup pisassiiffiusup siuliani aalisarnissamut qinnutigineqartup akuersissutip taamaaqataanik peqarsimanngitsoq”.
Ingerlatsisoq nutaaq avataasiorluni aalisarnermik ingerlataqareersoq nutaajusinnaanngitsoq, Jens-Frederik Nielsen isumaqarpoq. Taamaattumillu ingerlatseqatigiiffiit taakku marluk Norsaq ApS aamma Tuukkaq Trawl ingerlatsisut nutaajunersut, Naalakkersuisunut apeqqutigaa.
- Ingerlatsisut nutaat marluusut ingerlatsisut nutaajupput aalisagaqatigiinni allani aalisarnermi ilaanikuunngitsut, akissuteqarpoq.
Apeqqutit amerlanerusut nassiukkai
Avataasiorluni saarullinnik aalisarnissamut ingerlatsisut nutaat ilumut inissaqarnersut Naalakkersuisut kisitsinikkut ersarissaasumik pilersitaqarnikuunersut, Jens-Frederik Nielsenip maanna paaserusuppaa, aamma ingerlatsisunik nutaanik isertitsissallutik aalajanginnginnermi avataasiorluni saarullinniarlutik aalisartunik ingerlatsereersunik Naalakkersuisut oqaloqateqarsimanersut.
Nunatta Kangiani saarullinniarluni avataasiorluni saarullinniarnermi biologit innersuussutaat 8.400 tonsimiittoq, taassuma oqaatigaa. Siunnersuineq taanna annertungaatsiartumik qaangerneqassaaq (ingerlatsisumut nutaamut tunniunneqarsinnaasoq allaat kisimiilluni 7.515 tonsimiippoq).
Taamaammat taassuma paaserusuppaa, suna tunngavigalugu Nunatta Kangiani avataasiorluni saarullinnik aalisarnissamut ingerlatsisunik nutaanik isertitsisoqarnissaanik Naalakkersuisut siunertaqarsinnaasorippat, pisassallu innersuussutigineqartuniit annertunerungaareeqisunut ingerlatsisoqareeraluartoq.