Jens-Frederik Nielsen: Namminersorneq pillugu Inatsimmi aningaasaqarnikkut pituttornerit isumaqatiginninniutigineqaqqittariaqarput

Suliassaqarfinnik Danmarkimi angerlaassuiniarneq politikerinut ukiorpassuarni ajornartorsiutaasarpoq, tassani akisussaaffinnik nutaanik angerlaassuinissamik isumaqatigiissuteqarnissaq iluatsittanngilaq.

Aningaasaqarneq anguniakkanut unitsitsikkajuttarpoq, Kalaallit Nunaata suliassaqarfiit angerlaanneqartut ingerlanneqarnerinut akilertassagai, Namminersorneq pillugu Inatsimmi 2009-meersumi allassimasoqarmat.

Namminersorneq pillugu Inatsimmi tamatuma atorunnaarnissaa, Jens-Frederik Nielsenip Demokraatini siulittaasup oqariartuutigaa.

Partiimi siulittaasoq taamaattumik aalajangiiffissatut siunnersuuteqarpoq, ”Namminersorlutik Oqartussat Naalagaaffillu aningaasatigut inissisimanerat immikkut sammillugu, Namminersorneq pillugu Inatsisip kukkunersiorneqarnissaa pillugu isumaqatiginninniarnissat aallartinnissaat anguniarlugu, Naalakkersuisut Rigsmyndighedimut attaveqarnissaat.”

- Akimmiffilersuisoq

Namminersorneq pillugu Inatsimmi tamanna politikkikkut ineriartornermik akimmiffilersuisoq, Jens-Frederik Nielsen siunnersuumminut tunngavilersuummini allappoq:

- Isumaqatigiissummi aningaasatigut inissisimaffik Kalaallit Nunaanni politikkikkut ineriartornissatsinnut toqqaannartumik akimmiffilersuilersimavoq.

- Namminersorneq pillugu Inatsimmi allaqqavoq Naalagaaffimmiit akisussaaffiit angerlaassat Kalaallit Nunaata ingerlatsinikkut namminneq akilissagaat. Siusinnaerusukkut imaassimavoq Kalaallit Nunaat akisussaaffik angerlaassaanut Naalagaaffimmut sipaarutaasut tapiissutigineqartartunut annertusaatigineqartassasut.

- Allannguineq tamanna akisussaaffinnik angerlaassuinissatsinnut unittoortitsisoq ersareqqissaarpoq. Tamannalu ukiorpassuangortuni politikkikkut nammineq aalajangersaasinnaanerulernissatsinnut annertusaannginnitsinnut kinguneqarpoq. Ineriartorneq tamanna killormut ingerlaneruvoq, partiimi siulittaasoq allappoq.

IA ataatsimiititaliamik siunnersuuteqarpoq

Naalakkersuisut Jens-Frederik Nielsenip siunnersuutaanut isumminngillat, Inatsisartut apeqqummut isummernissaat utaqqimaarniarpaat.

Maannakkorpiaq Naalakkersuisut suliassaqarfinni pingasuni misissueqqissaarnermik suliaqarlutik ilisimatitsipput, ukunani:

• Inatsisartut aalajangiinerisa 2022/60-ip malitsigisaanik Danmarkimi assartuussinermut ministereqarfik Naalakkersuisut piumasaqarnerat malillugu aqqusinertigut angallannermut suliassaqarfiup tiguneqarnissaanut misissueqqissaarnermik suliaqarpoq;
• Aalisarnermut Piniarnermullu Naalakkersuisoqarfik uumasut nakorsaqarnermut inuussutissanullu suliassaqarfiup tiguneqarnissaanut misissueqqissaarnermik suliaqarpoq – tassalu Inatsisartut aalajangiinerat 2019/132 malitseqartillugu; aamma
• Nunanut Allanut, Inuussutissarsiornermut Niuernermullu Naalakkersuisoqarfik ingerlatseqatigiiffinnut, naatsorsuutinut kukkunersiuinermullu suliassaqarfimmi misissueqqissaarnermik suliaqarpoq.

Inatsisartuni oqallinnermi Namminersorneq pillugu Inatsisip isumaqatiginninniutiginissaanut naalakkersuisoqatigiinneersut Inuit Ataqatigiit itigartitsipput.

Partiip taarsiullugu ataatsimiititaliarsuarmik imaluunniit ataatsimiititamik pilersitsisoqarnissaa siunnersuutigaa, tassani ilaatigut suliassaqarfiit angerlaassorneqarnissaat oqallisigineqassapput. Ataatsimiititaliarsuaq Danmarkimit aallartitanit peqataaffigineqarsinnaassaaq.

Siumut allannguutissatut siunnersuuteqarpoq

Siumup Namminersorneq pillugu Inatsisip isumaqatiginninniutiginissaa aamma kissaatiginngikkaa, Kuno Fencker oqaluttuarpoq.

Jens-Frederik Nielsenip siunnersuutaa ilalerneqanngikkaluartoq, Demokraatinit suliassaqarfinnit angerlaassinissamut siunnersuutit marluk ataatsimiititalianut suliassanngortinneqarput.