Jens-Frederik Nielsen: Naalakkersuisut utoqqatserniarpat?
Demokraatit siulittaasuata Peqqissutsimut Naalakkersuisoq avoqqaaraa, piumasaralugulu illuatungiliuttunik salluneraasimanini imaluunniit piareersarsimannginneraanini utoqqatsissutigissagai.
- Peqqissutsimut Naalakkersuisoq pilersaaruteqarnerluni illuatungiliuttuniit salluliorsimasutut imaluunniit ataatsimiinnissamut ulloq 19. November 2021-mut piareersarsimanngitsutut kusanaatsumik taajuisimanini utoqqatsissutigissallugu?
Demokraatit siulittaasuata Jens-Frederik Nielsenip paragraf 37 naapertorlugu Peqqissutsimut Naalakkersuisumut Kirsten L. Fenckerimut apeqquteqarnini taamatut aallartippaa.
Internetsikkut tusagassiiiviup Sermitsiaq.AG-p ilanngutassiaa tunngavigalugu taamatut apeqquteqarpoq, ilanngutassiami illuatungiliuttut Naalakkersuisut coronap ajornartorsiortitsineranut atatillugu killilersuutit aalajangiunneqarmata peqataatitsisimanngitsutut isornartorsiorpaat.
Tassunga atatillugu illuatungiliuttut isumaqarput, killilersuutinik allannguineq pillugu ilisimatitsissuteqarneq killilersuutinillu allannguinissamik aalajangiinerni partiini siulittaasut peqataatinneqartarnerat assigiinngissuteqartut.
Sallupput piareersarsimanngillalluunniit
Kirsten L. Fenckerip tassunga akissuteqarluni oqarsimanerata: ”Sallupput imaluunniit novembarip 19-ani ataatsimiinnitsinni inassuteqaat atuarsimanngilaat paasisimanaguluunniit” , Demokraatit siulittaasuat akissuteqartippaa:
- Qinikkatut politikkikkut sulinitsinni pingaarnerpaanut ilaavoq tamanut ammasumik tatiginartumik saqqummertarnissaq. Taamaattumik paatsuugassaanngilaq, iliuusissani kusanannginnersaannut ilaammat sallunerartissalluni imaluunniit suliamik paarinnissimannginnerartissalluni, Jens-Frederik Nielsen tunngavilersuisovoq.
Siulittaasoq utoqqatserniarpa?
Jens-Frederik Nielsenip apeqquteqarnermini nassuiaatigaa, mailikkut utoqqatserfigineqarnissaq piumasarisimallugu, sulili akissutisisimanani
- Tatiginninnera naqqanneqqavoq (Kirsten Fenckerimut) uterteqqinniaruniullu suliassaqangaatsiarpoq. Piumasaqaatitaqanngitsumik takinerunngitsumillu tamanut ammasumik utoqqatserneq aallarniut pitsaasuussooq, taanna allappoq.
Jens-Frederik Nielsenip tassunga atatillugu paaserusuppaat, Naalakkersuisut Siulittaasuat Múte B. Egede Kirsten L. Fenckeri sinnerlugu utoqqatserniarnersoq.
Ilanngullugu paaserusuppaa, Peqqissutsimut Naalakkersuisoq paasinerlunneqarsimassaguni sooq naqqiissuteqarsimannginnersoq.