Jens-Frederik Nielsen: Isumaqatigiissummi amigaatigaakka suliniutit tigussaasut
Demokraatini siulittaasoq Jens-Frederik Nielsenip IA-p aamma Naleqqap naalakkersuisoqatigiinnissamut isumaqatigiissutaa atuarsimavaa. Inuiaqatigiit aningaasaataasa amerlanerulersinnissaannut suliniutinik peqannginnera ernumanarluinnartutut isigaa.
Oqaatsit kusanartut naalakkersuisoqatigiit isumaqatigiissutaanni allassimasut amerlasoorujussuupput. Suliassaqarfinnili taaneqartuni qanorpiaq pitsanngorsaanissamut suliniutit, aamma inuiaqatigiit aningaasaataasa amerlanerulernissaannut suliniutissat amigaatiginarput.
- Nunatta ingerlannissaannut ataatsimoorussamik takorluugaqarnerit allanneqarsimapput. Qulaaniit ataatsimut anguniakkat piginissaat aamma ajunngitsuusinnaavoq. Kisiannili uani amigaatigaakka suliniutit tigussaasut, Jens-Frederik Nielsen Sermitsiaq.AG-mut oqarpoq.
Aningaasat suminngaanniissappat
Ilaatigut taavai Inuit Ataqatigiit aamma Naleqqap akileraartarnermut utoqqarnullu tunngatillugu aaqqissuusseqqinnissamik anguniagassai. Inuit Ataqatigiit qineqqusaarnermini oqariartuuteqarpoq isertitat aallaavigalugit akileraartarneq anguniarunnaarsimallugu. Naalakkersuisoqatigiilersulli assaannit akileraartarnermi aaqqissuusseqqinneq suliarineqartussanngorpoq, inuiaqatigiinni naligiinnerulernissaq anguniarlugu.
- Ersarlussoraara akileraartarnermut tunngatillugu qanoq naligiinnerulernissaq isumaqartinneqarnersoq. Akileraartarnermi naligiinneruneq pineqartillugu akileraarutissap annertussusissaa pineqarpa imaluunniit akileraareernermi aningaasat nammineq tigummiassat amerlassusaat pineqarpat, Demokraatit siulittaasuat apeqqusiivoq.
Utoqqaat pillugit aaqqissuusseqqinnissamut tunngatillugu aamma taama isummerpoq. Inuit Ataqatigiit qineqqusaarnermi oqariartuuteqarpoq utoqqaat atugaat piaarnerpaamik pitsanngorsarneqartariaqartut. Naalakkersuisoqatigiinnissamulli isumaqatigiissummi tallimanngormat atsiorneqartumi qanoq piaartigisumik suliarineqarnissaat atuarneqarsinnaanngilaq.
- Aap, anguniakkamisut allappaat. Kisianni suliniutit piffissalersorneri amigaatigaakka, tamanna uggornarpoq, Jens-Frederik Nielsen oqarpoq.
- Aamma suliniutitut taagorneqartut qanoq aningaasartassaqarnersut ilanngunneqarsimanngillat. Neriorsuutit qanoq aningaasartaqarnissaannik qineqqusaarnermi ujartuisarsimavunga, aamma suli ujartuigaluarpunga, oqarpoq.
Inuiaqatigiit aningaasaataat amerlanerulinngillat
Jens-Frederik Nielsenili naapertorlugu ernumanarnerpaasoq tassaavoq naalakkersuisoqatigiit isumaqatigiissutaanni aningaasat isaatitsissutaalersinnaasut nutaat pillugit siunertaqartoqannginnera. Qineqqusaarnermi partiit tamarluinnangajammik oqariartuuteqarput nunatta karsianut nakkartartut aningaasat amerlanerulertariaqartut.
- Isumaqatigiissummi inuiaqatigiit lagkagiannik anginerulersitsinissamik siunertaqartoqanngilaq. Immitsinnut sullitiinnarutta, karsi imaaraluttuinnassaaq, ernumanartoqartipparalu neriorsuutit aningaasartassaat qissiminneqarsimanngimmata, Jens-Frederik Nielsen oqarpoq.
Sumi peqataasinnaappat
Demokraatit erseqqissaapput sammisatigut arlalitsigut Naalakkersuisunut nutaanut suleqataasinnaallutik.
D-mi siulittaasup oqaatigaa meeqqat, inuusuttut ilaqutariillu pillugit naalakkersuisoqarfeqalernera nuannaarutigalugu. D aamma IA-mut N-imullu isumaqataalluinnarpoq inuit innarluutillit pillugit pitsanngorsaanissamut suliassaqartoqarneraammata. Tamanna nalunaarusiat aallaavigalugit susassaqartullu qanimut suleqatigalugit ingerlanneqassasoq.
- Tamakku ilaatigut suleqataaffigerusuppagut. Aamma utoqqaat atugai pillugit. Uaniliuna amigaatigiginga pitsanngorsaanissamut suliniutit tigussaasut suuneri, qanorlu aningaasartassaqarneri, Jens-Frederik Nielsen oqarpoq.