Jens-Frederik Nielsen: Akileraarut appartilli
Demokraatinit Jens-Frederik Nielsenip akileraarusersuinermik ajornannginnerusumik aalajangiiffigisassatut siunnersuutaa Inatsisartuni ullumi oqaluuserineqassaaq. Akileraartarnerulli annikinnerulertinnissaanut aningaasat sumit aaneqassanersut siunnersuummi allassimanngilaq.
Jens-Frederik Nielsenip Naalakkersuisut peqquniarpai upernaakkut ataatsimiinnissamut siunnersuuteqaqqullugit. Siunnersuummi qulakkeerneqassaaq akileraaruseriaaseq ajornannginnerusoq, "Kalaallit Nunaanni akileraarut ataatsimoortumik apparluni" aammalu aningaasarsianut akileraarutit appartinneri, siunnersuummi allassimavoq.
- Demokraatit akileraarusersuineq ajornannginnerusoq kissaatigaat. Kissaatigaarput akileraarusersuineq appasinnerussasoq. Aammalu kissaatigaarput innuttaasut sulillutik aningaasarsiarisimasartik annertunersaa paariinnassagaat, Jens-Frederik Nielsen aalajangiiffigisassatut siunnersuummini tunngavilersuivoq.
Aalajangiiffigisassatut siunnersuummini kissaatigaa Naalakkersuisut akileraartarnermut tunngatillugu aaqqissuusseqqinnissaminnut suliaat sumut killinnersut paasisaqarfigissallugit. Naalakkersuisoqatigiimmi isumaqatigiissutiminni anguniakkatut tamanna allassimammassuk.
Aningaasaqarnermut Naalakkersuisup Naaja Nathanielsenip akissuteqaammini erseqqissarpaa Naalakkersuisut akileraartarnermi aaqqissuusseqqinnissamut arlariinnik ingiaqatigiittussanik suliaqartut. Jens-Frederik Nielsenilli siunnersuutaa taama isikkoqartillugu akuerineqassanngitsoq naalakkersuisoq kissateqarpoq.
Kina akiliissava
- Siunnersuutip qanoq aningaasalersornissaanik innersuussisoqannginneq itigartitsinermut tunngaviuvoq. Akileraarusiinernik appartitsinissanik siunnersuutit iluanaarutitigut annaasassanik qanoq aningaasalersuisoqarnissaanik malitseqartinneqartariaqarput. Nunap innuttai aningaasat suminngaanniit aaneqarnissaanik oqaluttuunnagit, akileraarutit apparnissaannik neriorsuineq ajornannginnersiuineruallaarpoq, Naaja Nathanielsenip akissuteqaatimini tunngavilersuivoq.
Sermitsiaq.AG-p Jens-Frederik Nielsen aperaa nunatsinni akileraartarnerup appartinneqarnissaanut aningaasat suminngaanniit nassaarineqarnissaannut siunnersuutissaqarnersoq.
- Qitiusumik allattoqarfimmi allaffissornerup annikillisarnissaa siornatigut oqaatigisareerparput. Aammali akileraartarnermut atugarissaarnermullu ataatsimiititaliarsuaq arlalinnik innersuussuteqareerpoq, innuttaasut kaasarfimminni aningaasaateqarnerulernissaanut qanoq iliortoqarsinnaaneranut tunngatillugu, Jens-Frederik Nielsen oqarpoq.
Ataatsimiititaliarsuup innersuussutaanut ilaapput akiitsoqarnermi ernianit ilanngaatsittarnerup aamma akileraartarnermi ilanngaatsittarnerup allanngortinneqarnissai.
Paasissutissat pigereerpagut
- Siunnersuuteqarnerni Naalakkersuisut akileraartarnermut aaqqissuusseqqinniarnerat ukiunik arlalinnik ingerlasussaanera pillugu isornartorsiuivutit. Namminerli siunnersuutigisatit aamma imaaliallaannaq naammassineqarsinnaanngillat. Sooq allatut ingerlarusunneruit Naalakkersuisut sulinerat malinnagu?
- Akileraartarneq pillugu aaqqissuusseqqinnissamullu tunngatillugu paasissutissat naammattut pigaagut. Taamaammat Demokraatinit kissaatigaarput sulineq maanna aallartissasoq, akileraartarnerup annikillisinneqarnissaa pillugu. Naalakkersuisut suliaannik tigussaasunik paasisaqarusuppugut, taamaattumik aamma taama siunnersuusiorpunga, Jens-Frederik Nielsen Sermitsiaq.AG-mut oqarpoq.
Naalakkersuisut akileraartarnermut aaqqissuusseqqinnissamut suliaat ilaatigut inummut akileraarummik aaqqissuusseqqinnermik, inuussutissarsiornermut akileraarusiisarnerup aaqqissuuteqqinnermik aamma suleriaatsinik taakkulu nassataannik pisariillisaaneq digitalinngorsaanermillu imaqassasoq Naalakkersuisoq ilisimatitsivoq. Suliat ukiuni arlalinni ingerlassasut Naalakkersuisunit naatsorsuutigineqarput.