Politik tusagassiutillu
Jens B.: Tusagassiutit ajunngilaq uuminalaartaraluarunik
Demokraatit siulittaasuata Jens B. Frederiksenip politikkerit akisussaasut tusagassiutinut nalunaarutit tunuannut toqqortarnerat isornartorsiorpaa
Nunafondenip siulittaasuata Per Berthelsenip tusagassiutinut oqaaseqarujumajunnaarnerata tusagassiutit kisiisa pillarnagit innuttaasut aamma pillarai, Demokraatit siulittaasuat Jens B. Frederiksen isumaqarpoq naalakkersuisooqatigiit tusagassiutinut pissusilersornerat pillugu oqaaseqaateqarnermini.
Atuaruk: Per Berthelsenip tusagassiutini 'malersugaanini' kamaatigaa
Politikkerit nuimasut arlallit tusagassiutinit pineqarnertik ajoralugu saqqummertalerput. Demokraatilli siulittaasuat Jens B. Frederiksen isumaqarpoq Nunatsinni tusagassiutit suli sakkortunerusinnaalluartut.
Demokratiimut ajornartorsiutaavoq
Jens B. Frederiksenip innersuuppaa naalakkersuisooqatigiinni ilaasortat tusagassiutinut pissusilersornerat kingullertullu Nunafondimi siulersuisut siulittaasuat Per Berthelsen Siumumeersoq nalunaarpoq tusagassiutinut oqaaseqaqqinniarani facebookimilu quppernini atorneruniarlugu.
- Oqaaseqarumannginnerup ajornartorsiutitarivaa tusagassiorfiit pillarneqaannaratik – aamma innuttaasut pillarneqarmata. Demokraatini isumaqarpugut innuttaasut pisussaasut namminneq aalajangissallugu suliami suugaluartumiluunniit suna eqqornersoq eqqunnginnersorluunniit. Inuiaqatigiillu aatsaat aalajangiisinnaapput paasissutissanik nerlersorneqarunik aamma suliamut pineqartumut akuusut oqaaseqarusuppata, Jens B. Frederiksen oqarpoq.
Kina akinissamut qununngila?
Taanna isumaqarpoq tusagassiutit uuminarsinnaasunik aammalu sianiippalukkaluanik aperisinnaasariaqartut ujartorpaalu politikkerit akissuteqarnissamut qununngitsut.
- Tusagassiorfiit demokratimut pingaaruteqarput aamma siunissami suli pingaaruteqarnerulersussaapput. Tusagassiortut qaqilerisinnaasut pisariaqartippagut, aalajangikkat pillugit isornartorsiuerpalaartumik apersorsinnaasut aamma sapiissusillit isornartorsiuerpalartunik, imaannaanngitsunik qinngarnartunillu apeqquteqarnissaminnut – aamma – sianiissalaartunik politikerinut pissaanermillu tigummisunut aperinissaminnut. Paarlattuanik aamma politikerit pisariaqartippagut qununngitsut apeqqutinut akinissaminnut aamma imaaliallaannarlutik annulerneq ajuallannerlu ajortut tusagassiortut naatsorsuutigisaminnit allaanerulaartumik pissuseqaraangata, Jens B. Frederiksen oqarpoq.