Amerikamiut Danmarkimi ambassadøriat Carla Sands naapertorlugu, USA Kalaallit Nunaannut "aningaasatigut ikiorsiinissamik suliaqarpoq".

Tapiissutit Kalaallit Nunaanni ineriatornermut annertusaaqqissapput, Altingetimi allaatigisamini allappoq.

De Konservativet isumaqarput, USA "isertunngilluinnarluni" naalagaaffeqatigiit tunngaviannik qajannarsisitsiniaasoq. Venstre nalunaarummik tigusilluarneruvoq, De Radikalet taakku akornanniinnerulluni.

- Kalaallit Nunaannut Issittumullu soqutiginnilluinartoqalernera takusinnaavatput, immitsinnut naalagaaffeqatigiinnermilluuunniit annaasaqassanngikkutta tamaviaarluta iliuuseqartariaqarpugut, nunanut allanut tunngasutigut oqaaseqartartoq Martin Lidegaard (R) oqarpoq.

Kalaallit Nunaat Issitumi inissisimanini nunamilu pisuussutini pissutigalugit politikkikkut soqutigineqartuuvoq.

Pissarsineq akeqartartoq

Amerikamiut Danmarkimi ambassadøriata, Ruslandip Kinallu Issittumi suliaqarnerat sakkortuumik isornartorsiorpaa, aningaasatigutllu tapiissuteqarnissaq eqqaallugu.

- Aallartisaasarneq nutaaliornerlu siuarsarniarlugit danskit naalagaaffiannik tamarmiusumik suleqateqarusuppugut, taamalu Issittumi aningaasatigut attanneqarsinnaasumik ineriartortitsineq uummarissarlugu.

- Amerikami naalakkersuisut aningaasatigut tapiissutissat, Kalaallit Nunaanni ineriartornermut annertusaaqqittussat sulissutigileruttorpaat, Carla Sands allappoq.

USA Kalaallit Nunaanni aallartitaqarfimmik qanittukkut pilersitsivoq, neriuutigalugu Issittumi suleqatissatut piumaneqarnerunissani.

Kalaallit Nunaalli upperinnippallaassanngilaq, nunanut allanut ministeriusimasoq Martin Lidegaard mianersoqqusivoq.

- Amerikamiut aningaasatigut tapiissuteqarnissamik aalajangersimagunik, aamma namminneq pissarsinissartik naatsorsuutigisimassavaat. Kalaallit Nunaat tapiissutinik pissarserusunnerluni nalilersuisariaqarpoq, Martin Lidegaard oqarpoq.

Taassuma erseqqissaatigaa, nalunaarutigineqartoq qanorpiaq paasisassaanersoq ersernerlummat isummerfigiuminaattoq.

Kalaallit Nunaata suleqatiginnilernissaq nammineq aalajangissavaa

Venstre nalunaarummik tigusilluarneruvoq, Kalaallilli Nunaannut tunngasutigut oqaaseqartartoq Christoffer Melsonip suna pineqarnersoq aamma nangaanartoqartippaa.

- Isumaqarpunga Kalaallit Nunaannit kissaatigineqartoq, inuussutissarsiornermut aningaasaliissuteqarsinnaasunik aningaasaqarnermillu ineriartortitsisinnaasunik ussagartitsinissaq, Kalaallilli Nunaata nammineerluni aalajangingassaraa qanoq annertutigisumik suleqateqarusunnini, taanna allakkatigut oqaaseqaatearluni allappoq.

Kalaallilli Nunaannut tunngasutigut oqaaseqartartoq Rasmus Jarloq naapertorlugu, partii qularuteqarnipilussuuvoq.

- USA isertunngilluinnarluni naalagaaffeatigiit tunngaviannik qajannarsisitsiniaavoq. Nakkutigineqaratik qanorluunniit iliortinneqartuartarput, suulli tamarmik killissaqartarput, naggataatigullu taamatut siunnerfeqarnertik unitsinngikkunikku Kalaallit Nunaanniissinnaanavianngillat.

- Tamanna akuersaarneqarsinnaanngilluinnarpoq, taanna Twitterikkut allappoq.