Japaniumusut assammik arsaanneq

- Ajunngeqaanga. Maani najugaqarnera nuannaraara. Nerisassat mamaqaat. Sungiusartarfigippoq. Inissiara ajunngeqaaq. Nagoya, illoqarfik najugaqarfiga, nuannerluinnarpoq. Soorunami inuppassuaqarpoq, iuvernanngilarli, Akutaaneq Kreutzmann oqaluttuarpoq.

Danmarkimiit Japanimut nuunnissaq pillugu aalajangerniarneq soorunami imaannaasimanngilaq. Isumaqatigiissutilli atsiunnginnerani Japanimi pissutsit takoqqaarsinnaasimagamigit, Akutaaneq Kreutzmann aalajangersinnaasimavoq.

Isumaqatigiissut siullermik 2020-mi maajip naanerata tungaanut killeqarpoq. Sungiusarneq allaanerugaanngilaq, Akutaaneq Kreutzmannimmi danskit klubbiini sungiusartarnerminit ilisimaarereerpaa. Allarpassuilli tamarmik allaanerupput.

Toyoda Gosei Blue Falcon

Unammeqatigisartagassai Toyoda Gosei Blue Falconimeerput. Japanimi assammik arsartartut iligiikkuutaat suliffeqarfissuarnit pigineqarput. Toyoda Gosei, suliffeqarfissuarmit Toyoda Gosei Blue Falconimit, biilit atortuinik sanasartumit pigineqarpoq. Suliffeqarfissuaq piginnittoq biilit issiaviinut atortunik suliaqartarpoq. Soorlu qulliit LED-iusut, silaannarissarfiit, radiot allarpassuillu.

Toyoda Gosei tassaavoq Toyota Groupsip ataani ingerlatseqatigiiffik. Toyoda Goseip assammik arsartartut pigisatuai Akutaaneq Kreutzmannip sungiusaqatigisarpai.

Piffissami unammisaqattaarfiusumi matumani tallimariarlutik unammereersimapput. Pingasoriarlutik ajugaapput, ataasiarlutik naligiillutik ataasiarlutillu ajorsarlutik. Unammisut holdit quliupput. Piffissamilu unammisaqattaarfiusumi iligiikkuutaat tamarmik pingasoriarlutik naapittassapput.

Unammisaqattaarnermi anngunniunnernut peqataanissani klubbip ukiut tamaasa anguniartarpaa, ukiualunnguillu allortarlugit unamminermi ajugaaniartarluni. Unammisaqattaarnermi Sydkoreaminngaanneersorpassuupput. Toyoda Gosei Blue Falcon unammisartuisa ilaat Taiwanimeerpoq. Sungiusaasutut ikiorti Spaniameersuulluni Akutaaneq Kreutzmannilu Kalaallit Nunaanneerluni. Sinneri japanimiuupput.

Illoqarfissuaq

- Nagoyami illoqarfimmi najugaqanngilanga, qanittuanili Inzawa Citymi najugaqarlunga. Nagoyami 2,2 milliuuninik inoqarpoq. Illoqarfeeqqat qanittuaniittut innuttai ilanngutissagaanni inuit 10 milliuuniupput. Taamaasiussagaanni illoqarfik Japanimi illoqarfiit annerit pingajoraat. Tokyomut 350 km-inik ungasitsigaaq. Qimuttuitsup sukkasuuliat ilaaffigalugit Tokyo akunneq ataaseq minutsillu 40-t atorlugit tikinneqarsinnaavoq.

- Uannut suna tamarmi nutaajuvoq. Sungiusanngikkaangatta takusassarsiortarpunga.

- Maani kiffaanngissuseqarnerunera nuannareqaara. Pilersaarusiorujussuanngikkaluarlunga susinnaaneq nuannarisarpara. “Ullormiit ullormut” inuunissaq uannut pingaaruteqarpoq. Maanilu taamaassinnaavunga.

Nutserisoqartoq

- Japanimi qisuit nerrisit atorlugit nerisoqartuaannarpoq. Soorlu ”Yakiniku”, ”Udon”, ”Yakitori”, ”Okonomiyaki” allarluinnaalluunniit, mamartorujussuupput.

- Oqaatsit ataasiakkaat oqaaseqartigiillu ilai aatsaat ilikkalerpakka. Tuluttut oqaatsit atorlugit attaveqarnerusarpunga nutserisoqartuaannangajallungalu.

Sumiiffinni tamani ikiuukkumatunerujussuaq Akutaaneq Kreutzmannip qujamasuutigaa.

- Japanimiut inussiarnertuaannarput. Ilaanni eqqarsartarpunga aamma ingasappallaangajattoq, taamaanngilarli aamma iluaqutaasorujussuuvoq, Akutaaneq Kreutzmann naggasiivoq.

Assammik arsaanneq timersuutini annersaanngilaq

Toyoda Gosei Blue Falconip Arenaani isiginnaartut 1.000-iusinnaapput. Timersuutit annerit sanilliukkaanni:

Baseball, isikkammik arsarneq, basketball judolu, isiginnaariartorisinnaasat amerlanngillat.

Japanimi Assammik Arsaattartut Kattuffiata assammik arsaannerup soqutigineqarnerulernissaa sulissutigiuarpaa. Suliniutit ilagaat arnat i Japanimi illoqarfinni tallimani assigiinngitsuni ingerlanneqarnissaat. Illoqarfik Kunamoto pingaarnertut unammiffiussaaq, pissartanngorniunnerit 30. novemberimiit 15. decemberip tungaanut ingerlanneqalerpata.