Japanimiit Danmark aqqusaarlugu Kalaallit Nunaannut Danmarkimullu uterlugu
Akutaaneq Kreutzmann nunanut allanut unammisartut Odensemi sungiusarniarlutik ukiortaareerpat katersuuteqqinnginneranni 16.000 kilometeringajaat timmisartorniarpoq
Nunanut allanut unammisartut Europami pissartanngorniuttoqarneranut atatillugu unammisaqattaarnerit unikkallarneranni Odensemi katersuunniarput.
Nunanut allanut unammisartut januaarip aappaani Odensemut tikissapput januaarillu arfineq-aappaanni klubberisaminnut uteqqissallutik.
Unammeqataasussatut toqqarneqarsimasut 16-it
Nunanut allanut unammisartut sungiusaasuata Ingi Olsenip unammisartut 16-it uku toqqarsimavai
Taatsiaq Villadsen GSS
Inuk Højgaard GSS
Isak Olsen GSS
Malik Andersen Kleist BSH
Lars Ole Lyberth GSS
Aqqalu Sandgreen GSS
Inuujuk Ostermann Søholm GSS
Minik Dahl Høegh Ajax København
Akutaaneq Kreutzmann Toyoda Gosei Blue Falcon
Angutimmarik Kreutzmann TIK Taastrup Håndbold
Miki Heilmann GSS
Nuka Heilmann GSS
Marco Geisler BSH
Inuk Olsen GSS
Kutaak Olsen GSS
Noah John Davidsen GSS
Nunanut allanut unammisartut Odensemiinnerminni pingasoriarlutik sungiusaatigalugu unammissaaput. Siullullugit 2. divisionimi pitsaanerpaamik inissisimasut Øst SUS Nyborg unammissavaat. Taamaaleriarlutik 1. divisionimi unammisrtut Otterup Håndboldklub aamma HC Odense unammissavaat.
Katersuunneq pingaarutilipilussuaq
Nunanut allanut unammisartut sungiusaasuanut ikiortip Rasmus Larsenip oqaloqatigigatsinni isertuunnagu oqaatigaa, kalaallit nunanut allanut unammisartuisa 2021-mi Egyptenimi nunarsuarmi pissartanngorniunnissamut anngunniunniarlutik katersuunnerat pingaarutilipilussuusoq.
- Mexico City-mi apriilip qaammataani Egyptenimi unammersuarnissamut anngunniulluta unammisaqattaalinnginnitsinni naggammik katersuuttussaavugut.
- Pingasoriarluta sungiusaatigalugu unamminissarput soorunami sakkortussaqaaq, Mexico Citymili unamminerit tamarmik aamma sakkortullutillu ajornakusoortussaapput.
- Qujanartumilli nunanut allanut unammisartut sungiusarsimanersut ernumassutigissanngilarput, sungiusarnikuuppummi. Mexicomi unammersuartoqarnerani unammeqataasussat inaarutaasumik toqqartinnagit allannguisoqarsinnaavoq.
- Ingerlalluarnissarput pingaarutilipilussuuvoq. Minnerunngitsumik immitsinnut nalunngissuserput eqqarsaatigalugu, aammali kattuffiup aningaasaliissuteqartartullu suliassamut tunngatillugu suliaqarsimanerat eqqarsaatigalugu, soorunalimi aamma Kalaallit Nunaat pillugu, Rasmus Larsen naggasiivoq.
Japanimut uterneq
Akutaaneq Kreutzmann Odensemi katersuutereerunik ungasissupilussuarmut angalaqqilissaaq. Japanimut klubberisaminullu Toyoda Gosei Blue Falconimut timmisartorluni uteqissaaaq. Aammaarluni 8600 kilometerit timmisartoqqissaaq. Assammik arsartartutut nunanut allanut unammisartoq angalanermik sungiussimasalik piffissap sivikitsunnguup ingerlanerani taamaalilluni 24000 kilometeringajalluinnaat timmisartussaaq.
