Jameson Landimi uuliaqarfiusinnaasut annertuut
Ukiuni arlalissuarni ujaasereerluni sumiiffimmilu akisuatitsisarluni misissuereerluni Greenland Gas and Oil 2022-mi Jameson Landimi qillerilersaarpoq
Ingerlatseqatigiiffik Londonimi aallaaveqartoq Greenland Gas and Oil A/S Tunup avannaarsuani Ittoqqortoormiit avannaani Jameson Landimi sumiiffinni angisuuni marlunni suli suliniuteqarpoq. Tamatumunnga atatillugu aamma Jameson Landimi sumiiffiit pingajussaannut akuersissuteqarfigineqarnissaminnik qinnuteqarput.
2014-imi ingerlatseqatigiiffiup akuersissut ukiuni qulini atuuttussaq immikkoortunut pingasunut agguarpaa. GEUS peqatigalugu akisuatitsisarlutik paasissutissanik sukumiisunik annertuunik suliaqarsimapput, siusinnerusukkut misissuinernut attavilernerisigut paasinarsilluni sumiiffimmi uuliamik nappartat 300 million aamma 3 milliardit akornanni amerlassusullit nassaassaasinnaasut kiisalu annertuunik arlalinnik gasseqarfeqarsinnaalluni.
2018-ip aallartinnerani ingerlatseqatigiiffik nalunaarpoq suliniummut 2,5 million pundit imaluunniit qallunaat aningaasaanni 21 million koruunit qulakkeersimallugit.
- Ukiuni kingullerni GEUS aamma Inuussutissarsiornermut Nukissiornermullu Naalakkersuisoqarfik qanimut suleqatigaavut sumiiffimmi ujarassiornikkut avatangiisitigullu pissutsit paasinerunissaannut piorsaanermi. Maanna sumiiffimmi paasissutissat tamakkiisut katersorsimalerpavut, taamaalilluta suliniummi immikkoortumut tullermut ingerlaqqissinnaalluta, matumani misissusallutigu 2022-mi ukiup sisamararterutaani siullermi Jameson Landimi qillernissamut periarfissaqassanersoq, Roderick McIllree Greenland Gas and Oilimi siulersuini siulittaasuunermi saniatigut aamma Bluejay Miningimi Dundasip eqqaani ujaasinissamut akuerissuteqartumi pisortaasoq oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: