Jakob Larsenip GOG ajugaateqqippaa

Århus Håndbold kingullerni pingasuni ajugaalluartarsimavoq, kingullermik Skjern Håndbold ajugaaffigalugu, naatsorsuutigipajaarlugulu ukiarmi Århusimi fynimiunut ajorsarsimanerminnut akiniaassallutik. Taamaattoqanngilarli.
Juullilernerani GOG Århus Håndbold-imut tunioraanngilaq, GOG Arena-mili isiginnaartunut 1300-nut minnerunngitsumillu TV-kut isiginnaartorpassuarnut tunissuteqarpoq. Muminnermi arfineq-marlunnik siuarsimavoq 17-10-mik. Århus Håndbold kingullerni arsarluartaraluaqisoq periarfissinneqanngilaq. Århusimiut sungiusaasuata Erik Vej Rasmussenip suut tamaasa atorlugit unammineq mumitsinniaraluarpaa. GOG-p straffernerit pingasut maangaannartikkaluarai sungaartunik tuluujuaralllit annilaangalersitassaanngillat. Århus Håndbold unamminerup immikkoortuata aappaata qiteqqunnerani GOG målinik marlussunnik qanilligaluarpaa, 25-20-milli qaninnerulinngillat, GOG-miullu unammilluaqimmata, minnerunngitsumillu målmand Kevin Møller annaasseqattaarmat, GOG 32-26-mik ajugaavoq.
GOG-mi arsarluarnersaavoq Snorri Gudjonsson, islandimiup 214-eriarluni nunanut allanut unammisarsimasup GOG-p saassussisarneri aqulluarpai unammilluaqalunilu arfineq-pingasunik isertitsivoq.
Akutaaneq Kreutzmann GOG-mi unammisuni kalaalersatuaaqqippoq. Minik Dahl Høegh kimmimmigut ajoquteqarluni suli unammeqataasinnaanngilaq. Kingullermik nalunaarutigineqarpoq Minik Dahl Høegh aatsaat januaarip qiteqqunnerani unammeqqittalersinnaasoq.
Jakob Larsenip ajugaaneq nuannaarutigaa
Tupaallannanngitsumik Jakob Larsenip unammisartumi unamminerat naammagisimaaqaa, unamminerup kingorna Sermitsiaq.AG-p aperimmani sooq taama unammilluartigisut:
– Unammisartukka tamarmik sekundit tamaviisa tamaviaarput, ullumikkutullu unammineq ingerlagaangat tamarmik unammilluarlutik, taava unammiuminaattartorujussuuvugut. Atituumik unammisartoqarpugut inissallu tamarmik inuttagissaarput. Aamma isumaqarpunga taktik-imik atasinnaasumik atuisimasugut. Ilaatigut Århus Håndbold-ip nalinginnaasumik isaatitsisarnerpaartaa Rune Ohm paarilluarparput taannalu ataasiinnarmik isertitsivoq. Rune Ohm Håndboldliga-mi isertitsinersaasimavoq.
– Taavalu nalissaqanngitsunik illersuisoqarpugut. Piffiit ilaanni siumut ingerlattarpaatigut qularnanngilarlu minutsini 60-ini tamani, sivisuumik nikuillutik ersaattaattarnerisa, unammisartuvut kakkannerulersittaraat.
Iluatsitsineq ulorianarsinnaavoq
GOG-p ingerlalluarnera kusanartumillu unammisarnera soorunami malugineqarsimavoq. Unamminerinut tamanut klubbinit sukalanerusunit agentit, timersoqatigiiffiit pisortaat sungiusaasullu takkuttarput GOG-mi unammisartut piginnaaneqarluartut malinnaaffigalugit.
Århus Håndbolg-imut ajugaanermi kingorna GOG Håndboldligami normu 3-uvoq, tullianillu juullip aappaani Ribe-Esbjerg unammisarfimmini unammissavaa.