Skip to main content

Jakob Larsen: Akiuunnianngikkuit qimaagit

GOG Randers HH-mut ajugaarujussuarnerani oqiliallattoqarpoq

Unammisaqattaarneq GOG-mut aallartinnerluppoq. Siorna bronzennattaat eqqaassutissaannanngoreerput. Randersimut unammisoqanngikkallarmat Jakob Larsenip unammisartui pointit sisamaannaat unamminerni arfineq marluusuni katersorsimavaat.

Pissutaasullumi arlaqarput: Unammisartut nutaat ilitaaminnut sungiussiniarnissaat. Ajoqusernerit. Minnerunngitsumillu Andreas Holst Jensenip sivittajaamik ajoquseqqanini pissutigalugu unammeqataasinnanngimmat Lars Haldimit Minik Dahl Høeghimillu maqaasineqarluarsimalluni. Norgemeersoq Espen Christensen Nunatsinneersorlu Frank Mikkelsen siornatut ingerlalluartigisimanatik.

Ingerlanerliortoqartarpoq

GOG Arenami unammineq aallartinngilaartoq sungiusaasoq Jakob Larsen isiginnaarianut ima oqaaseqarpoq:

- Assammik arsaanneq inuttut ippoq. Aporfeqartoqartarpoq. Taamaattoqartillugulu qimaaginnarnianngikkaanni akiuunnissaq toqqarneqartarpoq.

- Neriorsorsinnaavassilu unammisartugut akiuunnissaminnut piareersimalluarmata.

Akiuulluarput

4-1, 11-6 muminnermilu 19-12. GOG-p arsarluarnertik arsaannerup immikkoortuata aappaani attatiinnarpaa. Illersuisut arsarluanerisa GOG-p ingerlalluartarneranut ilisarnaataapput. 23-14, 31-22 arsanerullu inerneraa 36-24.

Mark Strandgaardillumi arsarluarnermigut takutitsilluarpoq. Isertitat arfineq pingasut unamminerup immikkoortuisa aappaanni iluatsinneqarput. GOG ajugaareernerup kingorna oqiliallattoq maluginiarnanngitsuunngilaq. Ingerlanerliorneq qaangiuppoq. Arsaqatigiillu sapaatip akunneri tulliuttut qanoq arsarluarsinnaanerlutik pilersaarusiorsinnaanngorpaat.

Assammik arsaalluni unammisaqattaarnerit unikkallarput. Landsholdillu unammisaqattaartussanngorlutik. GOG-milu unammisartut arfineq marluusut unammeqataasussaapput.

Unamminerit tulliuttut

GOG-p unamminissaa tulleq novembarip aqqaneq aappaani pissaaq. Taakku KIF Kolding Københavimut unammissallutik. Taassumalu kingorna juullinngitsiartoq sungiusarnerit sakkortuut allartinneqartussanngussallutik. GOG assammik arsarluni unammisaqattaarnermi qulingiluariarluni unammissaaq. Unamminerlu kingulleq decembarip ulluisa 23-ni ingerlanneqassaaq. Taannalu pereerpat EHF Cup svenskenut Alingås HK-mut unammisussaassallutik.

Allaaserisap ataani assit takukkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER