Jakob Janussen toqukkut qimaguppoq
Jakob Janussen sisamanngornerup tallimanngornerullu akornanni 81-nik ukioqarluni toqukkut qimaguppoq, taamaammat Namminersorlutik Oqartussat allallu pisortat allaffeqarfiisa erfalasui ullumikkut qiteqqusimapput.
Cand.scient.pol. Jakob Janussen, inuusoq 26. oktober 1941 toqukkut qimaguppoq. Tamanna Naalakkersuisut siulittaasuata naalakkersuisoqarfiata uppernarsarpaa.
Taamaalilluni nunarput ernerminik pingaarutilissuarmik annaasaqarpoq, taannami nunatta demokratiskimik ineriartorneranut annertuumik ilusilersueqataallunilu peqataasimavoq.
Jakob Janussen ilaatigut Ilisimatutarfimmi ilinniartitsisuusimavoq, tassanngaaniillu ataqqinaammik doktorinngortinneqarnikuulluni, Namminersornerunerup nalaani kingusinnerusukkullu pisortani qaffasissumik atorfeqartarsimavoq. Kingullermik nunatsinni ilusilersuisooqataaffigisaa tassaavoq namminersorneq pillugu isumalioqatigiissitami siulittaasutut aammalumi allaffissornermi aqutsisutut inissisimasimagami.
Aamma Janussen ilisimaneqarpoq politikkikkut pisunut nalilersuisartutut tusagassiuutinit atorluarneqartarluni. Ukiut ingerlanerini allaaserisat atuakkiallu arlallit pinngortissimavai, amerlanertigut Kalaallit Nunaanni ineriartornerup killiffianik poortuinani nalilersuillunilu pissutsinik isummani malillugu ersersitsisarluni.
Ilaatigut allaaserisaanut atuakkiaanullu ilaapput ”Det grønlandske aftalesystem”, ”Naalagaaffeqatigiinneq kalaallit isaannit isigalugu”, ”Tamat oqartussaaqataanerata Kalaallit Nunaanni atuutsinneqarnera” aamma ”Greenland’s Actual Political Situation with Particular Focus on Its Role within Danish Kingdom and at the International Level” taanna kingulleq Inuit Issittormiut kattuffiata ataatsimeersuarnerani 2010-mi saqqummiussaa.
Jakob Janussen 2017-mi Ilisimatusarfimmit ataqqinaammik doktorinngortitaavoq. Nuliani qitornatik inersimasut marluk ernuttanilu tallimat qimappai.