Jakob-ip KIF-imi utoqqasaat unammillerpai

Qallunaat assammik arsartartuini unammisartutoqqat unnugu unammissapput (qallunaat nalunaaqutaat malillugu nal. 17.15), tassanii GOG Håndbold-ip KIF Kolding København angutit håndboldliga-ni tikeraartigissallugu.
Gudme-mit qaffariarnikut sæsonimi aallartilluarsimapput unamminermi siullerni tallimani sisamariarlutik ajugaallutik, KIF Kolding-imeersut Fynimi siuttut unamminissaat sioqqullugu unamminerminni tallimani tamani ajugaasarsimasut.
GOG-p sungiusaasuata Jakob Larsenip upperaa unammisartumi KIF Kolding København unammillersinnaagaat.
– Tamaviaarutta angummassinnaavugut. Ajugaassanerluta takujumaarparput.
– Unammisartuvut inuusunnerupput, Koldingimi unammisartut utoqqasaajusut. taamaattumik ukiuni tulliuttuni utoqqaligaluttuinnartussat naggataatigullu unammisarunnaartussat.
– Unammisartutta sukalassusertik suli tigunngilaat, sæsonit arlallit ingerlareerpata sukalanertik aatsaat tigussavaat.. Unammisartunik ukuninnga siunissamut isumalluarpunga, Jakob Larsen oqarpoq.
Taassuma nassuerutigaa GOG Arenami unamminissami ajorsassangatinneqarlutik.
– Nalunngilara KIF Kolding unammisartorissaartoq ajugaasussatullu ilimagineqarluinnartoq. Unammisartuvulli inuusuttut sapinngisartik tamaat sukataarluaannassapput. Naatsorsuutigineqanngilaq ajugaaffigissagivut, Jakob Larsen oqarpoq.
Sungiusaasup, nammineq ukiorpassuarni GOG-mi unammisartuusimasup, akeratoqqaminnut KIF Kolding Københavnimut GOG Arenami ulikkaavissumi unamminissani qilanaaraa.
Aamma atuaruk: Akutaaneq, Jakob Minillu unamminermi tv-kut aallakaatinneqartuni pingasuni
– Kikkunnut tamanut misigisaq nalissaqassanngilaq. Unammisartutsinni immaqa marluk nalunngilatit, assammik arsarneq malinnaaffigilluartarukku immaqa pingasut. Tamassuma takutippaa holdini marlunni aqqit tusaamasallu qanoq assigiinngissuteqartigisut. Taamaakkaluartoq unammisartutta tamavimmik uppernaat ajugaasinnaallutik, Jakob Larsen oqarpoq.
Unamminissamut billetsit tamarmik qangali nungunneqarsimapput, unamminerli tv2-mi isiginnaarneqarsinnaavoq.