Jakob Ellemann-Jensen Venstemi siulittaasutut qinerneqarpoq

Jakob Ellemann-Jensen (V) maanna Venstremi siulittaasutut imminut taasinnaanngorpoq.

Arfininngornermi ullaap tungaani immikkut ittumik nuna tamakkerlugu Herningimi ataatsimeersuartitsisoqarnerani unammillerteqarani Lars Løkke Rasmussenip (V) kingoraartissaatut qinerneqarpoq.

- Qinersinermut aamma tatiginninnermik uannut takutitsinissinnut qujanarujussuaq. Sapinngisara tamaat naammassiniarlugu iliuuseqassaanga.

- Kisianni ataatsimik qinnuigissavassi – asasakka ikinngutit – qanoq aqqusaagaqaqqammernerput eqqaamaqquara. Eqqaamasiuk, taamaalilluta immitsinnut eqqaasittassagatta, taamatullu pinngitsoortissinnaallugu, Jakob Ellemann-Jensen qinerneqarnermi kingorna taama oqarpoq.

Taamaalilluni Danmarkimi partiit talerperliit annersaat aggustimi perulluliorfiusup kingorna nutaamik siulittaasortaarpoq. Tassani iluinni eqqissiviilliornerup kingorna Løkke siulittaasutut tunuarpoq. Kristian Jensen (V) aamma Løkkep tunuarnerata kingorna siulittaasup tulliatut tunuarpoq.

Løkke aamma Kristian Jensen Venstremi ukiuni qulini siulittaasutut aamma siulittaasup tulliatut atorfeqarput.

Venstrep partiimi allattaata, Claus Richterip, Venstremi ilaasortat aallartitat 850-nit amerlanerusut Herningimi tikilluaqquai. Løkkep aamma Kristian Jensenip taamaatinnerat ”peqqarniitsutut” oqaatigaa.

- Partiitsinni siulittaasup aamma siulittaasup tullianit taamaatinnermik taama assortuitigisumik aamma soqqusaatsigisumik siornatigut misigisaqarnikuunngilagut, Richter oqarpoq.

Jakob Ellemann-Jensen ataatami tumai atuarpai. Nunanut allanut tunngasunut ministeriusimasoq, Uffe Ellemann-Jensen 1984-imit 1998-imut siulittaasuuvoq.

Venstremi siulittasunngorneq Jakob Ellemann-Jensenip politikkikkut sulinermini maanna angusaasa annersarigallarpaa. Taanna 2011-imi Folketingimut qinigaavoq.

Taanna avatangiisinut inuussutissanullu tunngasunut ministeritut 2018-imit 2019-imut sivikitsumik ministeritut misilittagaqarpoq. Taamaattorli Jakob Ellemann-Jensen Venstremi politikkikkut oqaaseqartartutut qaffasissumik atorfeqarnikkuuvoq.

Jakob Ellemann-Jensenip sakkutuuni sulisimasup suliassaata tullia tassaavoq, ministeriunermit Mette Frederiksenimit (S) Naalagaaffiup ministeriaqarfianut matuersaatinik arsaarnissaa.

Nuna tamakkerlugu ataatsimeersuartoqarnerani Løkke peqataanngilaq. Novembarimi ileqquusumik ataatsimiittoqarnissaanut peqataanissani naatsorsuutigalugu oqaaseqarnikuuvoq.