Jacob Nitter: Una pisoq avaqqussinnaanngilarput
Naleqqami siulittaasoq Pele Broberg sulisitsisukuminut Air Greenlandimut periusissiamik amigaateqarneraallunilu ajortumillu tulleriiaarisoqarneraavoq, tamanna Jacob Nitterip ilumuunnginnerarpaa, Naalakkersuisunilu siulittaasup Namminersorlutik Oqartussat suliffeqarfiutaata tulleriiaarineq tapersersorpaa.
Silarlunnera, timmisartussaaleqinerit, kingoraartissat kinguaattoortut, misissuinerni aporfiit aamma coronamik napparsimanerit tamarmik Air Greenlandip angallassiniarnermini ilungersunartorsiorneranut pissutaaqataapput. Tulleriiaarinermut tamanna tunngasoq, Naleqqami siulittaasoq Pele Broberg isumaqarpoq. Air Greenlandimi pisortap tamanna ilumuunnginnerarpaa.
- Una pisoq avaqqunneqarsinnaanngilaq, Jacob Nitter oqarpoq. Ulluni arlalinni sineriak tamakkerlugu pujornera aamma teknikkikkut ajutoornerit kingoraartissanillu amigaateqrnerit, Europamit timmisartunik attartugassaqannginnera, kiisalu unnuiffissaaleqinerit unammilligassarineqarput. Ajornartorsiutit nalinginnaanngitsumik qaleriaarput, Jacob Nitter Sermitsiaq.AG-mut oqarpoq.
Pele Brobergip ilaatigut timmisartortitseqatigiiffik periusissiamik amigaateqarnerarlugu, aamma aningaasaliinerit Nunatsinni silamut aamma attaveqarnermut eqqarsaatiginnittuunnginnerarlugit isornartorsiuivoq.
Naalagaaffiup aamma SAS 2019-imi piginneqataajunnaarsillugit Naalakkersuisullu kisimik Air Greenlandimit piginnittunngorlutik pisiarinninnerat sioqqullugu, periusissaq suliarineqarsimasoq, Jacob Nitter naqissusiivoq.
- Ersarissumik periusissiaqarpoq, taannalu malipparput, ilaatigut timmisartut nutarterneqarnissaat aamma Issittumik Sakkutooqarfiup annaassiniaasarnermut isumaqatigiissutaata suliarileqqinnissaa. Taakku tamakkiisumik naammassivagut, Jacob Nitter oqarpoq.
Niuerfik misissorluarneqartoq
Ilaatigut qulimiguulinnik nutaanik pisinerit aamma timmisartorsuup Norsap taartissaanik, ukiup naannginnerani tunniunneqarnissaanik naatsorsuutigineqartumik pisisoqarpoq.
Timmisartumut ataatsimut toqqarneqartumut taarsiullugu timmisartunik marlunnik minnerusunik pisisoqarsimasinnaagaluartoq, Pele Broberg isumaqarpoq, Norsap uninnganerani aporfiit teknikernerillu iliuuseqarfigisinnaajumallugit, timmisartunik attartugassarsioqqaarnani. Periarfissaq taanna piviusorsiortuunngilaq, Nitter oqarpoq, niuerfillu periarfissanik misissorluarneqarsimasoq oqaatigaa.
- Boeing, Airbus aamma timmisartunut siunnersortit suliamut tassunga peqataanikuupput. Timmisartoq nutaaq assigiinngitsutigut pingasutigut suliaqarluassaaq. Ilaasut, nassiussat aamma US Air Forcemut Pituffimmut timmisartuussisarnermut isumaqatigiissutitsinnik naammassinnissaaq. Timmisartorlu nutaaq soorunami aamma mittarfinnut nutaanut missinnaasariaqarpoq. Timmisartussarput taakkununnga missinnaavoq, timmisartuni taamaattuni minnerpaavoq tamatigoortuullunilu, Jacob Nitter oqarpoq.
Namminersorlutik Oqartussat ingerlatseqatigiiffiutaannut periusissianik nutaanik maannakkorpiaq suliarinnittoqartoq, Múte B. Egede, Sermitsiaq.AG-mut oqaluttuarpoq.
- Ataatsimut isigalugu maanna Naalakkersuisuusunut piginnittuunermut maanna atuuttumik politikkeqarnissaq pingaaruteqarpoq. Tamanna soorunami ulluinnarni ingerlatsisunit aalajangeeqataaffigineqartumik pissaaq.
Aningaasaqarnikkut sinaakkuteqarpoq
Air Greenlandimut tunngatillugu maanna suliaqartoqareerpoq, ingerlatseqatigiiffinnullu allanut, taanna ilisimatitsivoq.
- Siunissami periusissaq pillugu Air Greenland oqaloqatigilereerparput, ingerlatseqatigiiffiup piginnittuinik allanngortoqarneranut atatillugu periusissiaq naammassineqarnikuummat.
Pele Brobergip aamma qulimiguullit toqqarneqartut isornartorsiorpai, taakku sila pissutigalugu taamaatitsisariaqartarput. Attaveqarnermi pissutsit maannakkorpiaq qulimiguulinnik atortorissaarutit atorlugit timmisinnaasunut piareersimanngimmat, qulimiguullit taakku toqqarneqartut, Jacob Nitter nassuiaavoq, taamaattoqassappallu mittarfiit Mittarfeqarfiit akisussaaffigisaat nutarterneqaqqaartariaqarmata.
Qulimiguullillu taakku aningaasaqarnikkut sinaakkusiussat malillugit pisiarineqarlutillu ingerlanneqartussaapput. QUlimiguullit silarlunnerusumi timmisinnaasut kiffartuussinissamut isumaqatigiissutit qaffanneqarnerannik pisariaqartitsissapput, pisiarineqarneri ingerlanneqarnerilu akisunerugamik.
Taakku toqqarneqarpata taamaatitsisarnernut annertuumik iluaqutaasinnaagaluartut, taanna ilisimatitsivoq. Taamaammallu aamma periusissiami nutaami taakku misissorneqassapput, Múte B. Egede ilisimatitsivoq.
- Ukiamut piginnittunik ataatsimiititsissaanga, tassanilu ilaasunut angallassisarnerup pitsanngorsarnissaa ukkatarineqassaaq. Aningaasaliissutit pissarsiarineqarnissaat politikkikkut suliassaavoq, Inatsisartunullu periusissiamik ersarissumik saqqummiinissamik tamanna pisariaqartitsivoq.