Jacob Nitter: Tuukkap qaqugu angalaqqilernissaa nalunartoq
Timmisartorsuup Tuukkap qaqugu angallassileqqissinnaanera Air Greenlandip oqaatigisinnaanngikkallarpaa. Tuukkaq Kastrupimi sapaatip akunnerata siuliani ajutooreerlunili, kingoraartissamik maanna amigaateqarpoq.
Air Greenlandip timmisartuutaanut Tuukkamut kingoraartissat amigaataapput. Timmisartoq qaammatini pingasuni angallassereerluni ajutoorami, maanna angallassisinnaanngikkallarpoq.
Atlantikoq qulaallugu timmisartuussisartoq Norsaq martsimi naggataamik angallassereertorlu, Tuukkaq nutaarluinnaalluni timmisartuussinermik tamakkiisumik ingerlatsilerpoq. Timmisartorli Kastrupimi sapaatip akunnerata siuliani ajutooreerlunili angallassisinnaanngikkallarpoq.
Tuukkaq Frankrigimi Airbusip tunisassiorfiani sananeqarnikuummat, kingoraartissai tassanngaanniik pissarsiariniarlugit aamma, Airbus attaveqarfigineqarsimavoq. Kingoraartissanilli pissarsiniarneq sivisusinnaasoq, Air Greenlandimi pisortaaneq Jacob Nitter Sørensen Sermitsiaq.AG-mut oqaluttuarpoq.
- Kingoraartissat qaqugu tigussanerigut nalunarpoq, taamaammat oqaatigisinnaanngikkallarpara Tuukkaq qaqugu angalaqqilissanersoq. Tuukkap angallasseqqilernissaata tungaanut timmisartunik attartussaagut, angallassineq ingerlatiinnarumallugu, Air Greenlandimi pisortaaneq Jacob Nitter Sørensen oqarpoq.
Taanna oqaluttuarpoq kingoraartissat naqqaniik sanaartorneqartariaqassasut, imaluunniit timmisartorsualiornermit allamit pissarsiarineqartariaqassasut, Airbusimullu oqaloqateqarneq aallartereersimalersoq.
Nioqqutissat nungulluinnarsimasut
Kingoraartissat imaaliallaannaq pissarsiarinissaasa ajornarnerat nunarsuaq tamakkerlugu atuuppoq. Covid-19-ip kingorna taamatullu Ukrainemi sorsuttoqarnera pissutaalluni nioqqutissaliorniarneq ajornarnerulersimavoq.
Kingoraartissap utaqqiisaa timmisartumik maanna attartortoqarpoq:
- Allatut iliorsinnaanngilagut Københavnip Kangerlussuullu akornanni angallanneq ingerlaannassappat. Ajutooqqaneq uggornarpoq, timmisartumilli attartornissaq qujanartumik ajornanngilaq, oqarpoq.
Akisunaarneqassasoq
Niueqatigiinnermi sulineq pissutigalugu timmisartumik attartorneq qanoq akeqarnersoq Air Greenlandip ilisimatitsissutigisinnaanngilaa. Timmisartunimmi allanik attartornissamut isumaqatiginninniarnerit ingerlaavartuusinnaasarput, akilu pitsaanerpaaq anguniarneqartarluni.
- Oqaatigisinnaalereerparali tamanna akisungaatsiassaaq, aamma ilisimannginnatsigu Tuukkaq qaqugu angallasseqqilissanersoq. Soorunami ajutoornerup kingorna immikkut aningaasartuuteqarnerusussaavugut, aningaasartuuteqarnerunerpulli billetsit akiginut sunniuteqartussatut takorluunngilara, pisortaq oqarpoq.
A330-900neo Air Belgiumimiit 3. juni tungaanut Kangerlussuup Københavnillu akornanni angallassingallarpoq.
