Jacob Nitter: Ilaasut ulorianartorsiortinneqanngillat
Air Greenlandimi pisortap Jacob Nitter Sørensenip erseqqissaatigaa, pingasoriarluni mittariaqarsimanermi ilaasut sukkulluunniit ulorianartorsiortinneqarsimanngitsut, aamma timmisartunik aquttut pisunik ajunngilluinnartumik ingerlatsisimasut.
Air Greenlandip timmisartuutai Dash 8-t qaammatialuit ingerlaneranni ataasiaannaratik, aamma marloriaannaratik pingasoriarlutilli motoorip ataasiinnaap atuutilernerani mittariaqartarsimapput.
Timmisartoq patajaalluinnartuusoq ilaannikkooriarluni aamma ajoquteqalersinnaasarpoq, Air Greenlandimi pisortaq Jacob Nitter Sørensen Sermitsiaq.AG-mut nassuiaavoq.
- Dash 7-imut sanilliullugu timmisartumik Dash 8-mik ukiuni aqqanilinni ilaasunik angallassisimanitsinni mittariaqartarsimanerit ikittuararsuupput, taanna oqarpoq.
Inuttat pisumik ajunngilluinnartumik isumaginnissimasut
Jacob Nitter Sørensenip erseqqissaatigaa, timmisartut motoorimik ataasiinnarmik atortoqarlutik ingerlallutillu mittariaqarsimaneranni ilaasut sukkulluuunniit ulorianartorsiortinneqarsimanngitsut.
- Dash 8 kan flyve højere på en enkelt motor, end Dash 7-ip sisamanik motooreqarluni pisinnaasaanut sanilliullugu Dash 8 ataasiinnarmik motooreqarluni pisinnaasaqarneruvoq, taanna oqarpoq.
Pisortap nassuiaatigaa, ippassaq pisimasoq timmisartup assigata qanittukkut pineranut sukkulluunniit attuumassuteqanngitsoq.
Pisimasut marluk timmisartumi assigusumi pisimagaluartut maskiinap atortui imminnut attuumassuteqanngitsut ajornartorsiutaasimapput. Ajutoornermi sillimmataasussat ajoquteqarsimanngillat, aamma timmisartumik aquttut suliatik ajunngilluinnartumik naammassisimavaat.
- Pisisimasuni pingasuusuni inuttat suliaminnut pikkorilluinnarsimapput. Suliaq ajunngilluinnartumik naammassisimavaat, takutissimallugulu timmisartunik aquttorisartakkavut qanoq pikkoritsiginersut.
Sipaarniarsimanermit pissuteqanngitsoq
Pisortap erseqqissaatigaa, pisimasut timmisartup pisoqaassusaanut imaluunniit coronap ajornartorsiortitsinerani sipaaruteqarsimanermut attuumassuteqanngitsut.
- Aserfallatsaaliinissamut malitassat aalajangersimasuupput. Coronap atuunnerani naleqqussaasimanerput angallassinissamut pilersaarummut sulisunullu attuumassuteqarpoq, isumannaallisaanermut timmisartunillu aserfallatsaaliinermut attuumassuteqartumik sipaarniartoqarsimanngilaq.
Timmisartut aserfallatsaalineranni taarserneqartanngitsutuaq tassaavoq timmisartup timitaa. Timmisartumi atortut tamarmik akulikitsumik taarserneqartarput, tassa aserunnginnissaat qulakkeerniarlugu .
- Qaqutigoortumilli tamanna pigaangat, sulisoqarpugut tatigilluinnakkannik. Sulisutta isumannaallisaaneq pissutigalugu akulikinnerusumik mittariaqartarnerat akuttunerusumik pisarnissaanit piumaneruara, Jacob Nitter oqarpoq.