Saqqummersitsineq

Ivittuut aamma Kangilinnguit pillugit assinik saqqummersitsineq

Lyngbymi assinik saqqummersitsinermi Ivittuut aamma Kangilinnguit saqqummersinneqarput

Kangilinnguit

Aatsitassarsiorfiusimasoq Ivittuut aamma sakkutooqarfiusimasoq Kangilinnguit pillugit assinik saqqummersitsisoqarpoq. Sumiiffiimmi puigunaatsuupput, assinik 60-nik saqqummersitsisoq Peter Barfoed oqarpoq. Sumiiffinni taakkunani periarfissat assigiinngitsut pillugit assilisani saqqummersippai.

Saqqummersitsineq Lyngbymiissaaq, tallimanngornermi marsip 20-anit maajip pingajuata tungaanut saqqummersinneqassallutik.

Ivittuup aamma Kangilinnguit ilisimaneqarnerulernissaat anguniarlugu Peter Barfoed assinik saqqummersitsivoq.

Taakkumi periarfissarpassuarnik ammaasinnaasut oqaatigaa.

Peter Barfoedip Ivittuut peroriartorfigai, Danmarkimullu nooreeraluarluni ornittuartarlugu.

Sumiiffinni taakkunani ineriartortoqarunnaarnera Peter Barfoedip allanngortikkusuppaa.

Ivittuuni orsugiammik piiaaffiup 80'ikkunni matunera aamma Kangilinnguani sakkutuut imarsiortut matuneqarnerat ajuusaarutigaa.

Sakkutooqarfiup matuneqarnera uggornartoqartippaa.

- Kangilinnguani illut pitsassuupput nutaaliaallutik, taamaattumik qimanneqaannarnerat paasisinnaanngilara, ataavartinneqartussaagaluarpummi, oqarpoq.

Ineriartorfiusinnaasoq
Peter Barfoedip saqqummersitsinermini takutinniarpaa sumiiffiit taakku siunissami suli ineriartortinneqarsinnaasut. Atortussiornermut ineriartortitsineq tulluartuusoraa, kiisalu aamma erngup nukinganik nukissiorfimmik ammaasoqarsinnaasoq aamma tulluartillugu.

Taamaammat Naalakkersuisut siulittaasuannut Kim Kielsenimut siunnersuutigaa sumiiffiit taakku atorluarneqartariaqartut.

Saqqummersitsineq aamma Nuummi pissasoq naatsorsuutigineqarpoq.

Powered by Labrador CMS