IVF-imik suliaritinnissamut siunnersuut tunuartivinneqarsimavoq

Siumut Inatsisartuni gruppiata siulittaasua Doris J. Jensen naapertorlugu pisuussutiginagu meerartaarsinnaanngitsut suliaritinnerisa aningaasalersorneqarnissaannut siunnersuut, kukkuluttortoqarnera tunngavigalugu tunuartinneqarsimavoq. Maannali paasinarsivoq Siumut gruppiata nammineerluni siunnersuut tunuartissimagaa.

Siunnersuummi anguniarneqarpoq nammineq pisuussutiginagu meerartaarsinnaanngitsut Rigshospitalimi IVF-imik suliaritinnissamut, angalanermut najugaqarnermullu aningaasartuutaat, matussuserneqartalissasut.

Siumut Inatsisartuni allaffeqarfiata Sermitsiaq.AG-mut uppernarsarpaa siunnersuut pillugut Inatsisartuni siulittaasoqarfimmut 13. november 2019-imi tunuartitsinissamik allagaqarsimallutik.

- Siumut uppernarsaavoq immikkoortoq 216, ukiakkut ataatsimiinnermi 2019-imi oqaluuserineqartussaq, siunnersuuteqartumit tunuartinneqarsimasoq. Tunuartitsineq tunngavilersuutitaqanngilaq, Siumut Inatsisartuni allattoqarfia ilisimatitsivoq.

Siunnersuut siullermeerneqaranilu tunuartinneqarpoq.

IVF-imut aningaasassaqanngilaq

Siunnersuutip siullermeerneqarnissaanut akissuteqaammi, peqqissutsimut naalakkersuisuusimasoq Martha Abelsen allappoq, Naalakkersuisut ilisimatitsissutigaat "peqqinnissaqarfiup aningaasaqarniarnera ilungersunartoq".

- Taamaalilluni immikkut aningaasaliisoqartinnagu suliniutinik nutaanik aallartitsisoqarsinnaanngilaq, Naalakkersuisumit ilisimatitsissutigineqarpoq.

Siunnersuummulli akissuteqaammi allannguutissatut siunnersuutigineqarpoq IVF-imik suliaritinneq aningaasanut inatsimmut ilanngunneqassasoq. Tamannali pisimanngilaq, siunnersuutigineqartoq siunnersuuteqartumit tunuartinneqarmat.

Ukioq manna siunnersuuteqartoqarsinnaanngilaq

Doris J. Jensen oqaatigaa siunnersuutip ukioq manna ataatsimiinnernut ilanngutsinnissaa piviusorsiunngitsoq. Siunnersuutilli suliarineqaqqinnissaa sulissutigissallugu oqarpoq:

- Siusinnerpaamik Inatsisartut upernaakkut ataatsimiilerpata siunnersuuteqartoqartariaqassaaq, Doris J. Jensen oqarpoq.