Ivalup kingorna: Filmiliornerup nunarput takornariaqarnerulersissinnaavaa
Nunarput pillugu, nunatsinnilu filmiliornerit takornariat amerlanerusut nunatsinnik ilisimasaqalernissaannik kinguneqartussaapput. Tamanna inuiaqatigiinnut iluaqutaassasoq, filmiliortartoq isumaqarpoq.
Isiginnaagassiaq naatsuliaq 'Ivalu', Nuummi, Kangerlussuarmi nunaqarfimmilu inuerunnikumi Kangermi immiunneqartoq, isiginnaagassiartut naatsutut Oscarinnannissamut innersuunneqarami, nunatsinni siullersaavoq.
Isiginnaagassiamik peqataasut Oscarinnanngikkaluartut, taamaattoq isiginnaagassiap nunat tamalaat akornanni saqqumilaarnerata kingunerisinnaavaa nunarput takornariaqarnerulersoq.
Filmiliortartoq, Polarama Greenlandimillu piginneqataasoq, Emile Hertling Péronard, takornarialerisunut, nunanilu allani filmiliortartunut suleqatigiinnissamut pitsaasumut arlalinnik siunnersuutissaqarpoq.
Taassuma Visit Greenlandip nittartagaani oqaaseqarnermini erseqqissarpaa nunanit allaniit immiussiartorlutik tikittut nunatsinni filmiliornermik suliaqartut peqataatinnissaannut periarfissagissaarluinnarnerat.
- Kalaallit Nunaanni filmiliorneq imaannaanngilaq, eqqortumilli ikiuisinnaasunik piareersaasinnaasunillu attaveqaruit, sumiiffinni allani periarfissaanngitsunik tunineqassaatit, Emile Hertling Péronard oqarpoq nangillunilu:
- Nunani tamalaani suliniutinut Kalaallit Nunaanni filmilioraangatta amerlasuutigut filmimik sanaartortut isumaqartarput, Kalaallit Nunaat tassaasoq qaqqaq qaqineqarsinnaanngitsoq. Pisariinnerulersissinnaavarpulli, oqarpoq.
Takornarialerisunut attaveqarneq annertusarusukkaa
Filmiliortartoq Emile Hertling Péronard erseqqissaavoq soqutiginninnerujussuaq takornarialerisut filmiliortartullu akornanni ataqatigiinnerulernermik kinguneqarsinnaasoq. Takornarialerisut filmiliortullu nunatsinnik nittarsaassinermik suleqatigiinnissaat pissusissamisoorsoraa.
- Nunani tamalaani Kalaallit Nunaat takutissinnaavarput, saniatigullu Kalaallit Nunaanni filmiindustrii nukittuneq piujuartitsisorlu ineriartortillugu, oqarpoq.
Nunatsinnut immiussiartortut takornarialerisunit sullilluarneqartalereersut, taanna ilisimatitsivoq.
Polarama Greenlandimik piginneqataasup nunanit allaniit filmilioriartortut nunatsinni suleqatigiinnerulernissamik siunnersuuteqarfigai:
- Sumiiffimmi najugallit tusarnaartakkit. Piffissaliinerillu allanngorarsinnaanissai ammaffigalugit. Kalaallit Nunaanni pinngortitaq siammasissorujussuuvoq sunniuteqartorujussuullunilu, ingerlaannarlu paasissavat illit pinngortitamit aqunneqarlutit – killormuunngitsoq. Filmiliornissat pilersaarusiorukkut nikerarsinnaasunut ammasuunissaq pingaaruteqarluinnarpoq, oqarpoq itisilerlugulu sila pissutigalugu kinguaattoortoqarsinnaasartoq.