Filmimi naatsuliami 'Ivalu'-mi Oscarimut innersuunneqartumi suleqataasut, pingasunngornermi Los Angelesimut tikipput, tassani sapaatiuppat filmiliortarnerup silarsuaani nersornaatisisarnerit pingaarnersaattut nalilerneqartartoq ingerlanneqassaaq.

Pipaluup aamma angajuata Ivalup ataataattut inuttaasoq, Angunnguaq Larsen, taama oqaluttuarpoq.

Taanna isiginnaartitsisartullu allat maanna Sunset Boulevardimiipput.

- Seqinnarissumi maani Los Angelesimiilluni allaanngilaq sinnattorluni. Oscarimillu nersornaasiisoqarneranut peqataanissarput assut angivoq, Angunnguaq Larsen taama oqarpoq.

Isiginnaartitsisartut tamarmik – Nivi Larsen, Ivalumut inuttaasoq kisimi pinnani katersuussimapput. Isiginnaartitsisartoq inuusuttoq aatsaat kingusinnerulaartukkut timmisartumik tikinniarpoq, Angunnguaq Larsen ilisimatitsivoq.

Apersorneqarnerit aamma isiginnaartitsisartut tusaamasat

Unnuup pingaarutilik sioqqullugu tusagassiorfinnit apersorneqaattaarlutillu isiginnaartitsisartut allat Oscarimut innersuunneqartut peqatigineqarput, taanna nassuiaavoq.

Suleqataasut aamma Nukâka Coster-Waldau Nikolaj Coster-Waldauilu unnukkorsioqatigaat, taakku marluullutik Los Angelesimiipput.

- Qiimanarpoq, kikkullu tamarmik nuannisarput, Angunnguaq Larsen oqarpoq, Rena Owen, isiginnaartitsisartoq New Zealandimeersoq, ilaatigut 'Once Were Warriors'-imi isiginnaartitseqataasoq naapissimallugu oqaluttuarpoq.

- Taassuma assiliseqatigiumavaanga, taanna qiimmatsalluni illariarluni oqarpoq.

Angeqaaq

Suna annermik qilanaarineraa apeqqummut ima akivoq:

- Oscarip Nunatsinnut angerlaannissaa qilanaarinerpaavara. Neriuutitsinni taanna annersaavoq. Qanorluunniit pisoqarsinnaavoq, kisianni innersuunneqarnerpulluunniit angeqaaq.

Pipaluk K. Jørgensen 'Ivalu'-mi qallunaaq ilitsersuisoq Anders Walter peqatigalugu ilitseruisuuvoq. Sapaatiuppat filmimit naatsuliamit 'Ivalu'-mi Oscarimik nersornaaserneqassanersut paasinarsissaaq.