”Ivalu”-mik suliaqartut ajoraluartumik oscarimik nersornaasiinermit sapaammi unnukkut Los Angelesimi pisumit angerlaassissanngillat.

Filmeeralianit innersuunneqartunit ”An Irish Goodbye” nersornaaserneqarpoq, ”Ivalu” danskimit Anders Walterimit ilitsersuiffigineqartoq ajugaaffigalugu, taanna niviarsiaqqap nunatsinneersup angajuminik ujaasineranut tunngasuuvoq.

Kalaaleq Pipaluk K. Jørgensen filmimi ilitsersueqataavoq, taamatullu aamma kalaallit isiginnaartitsisartut arlallit isiginnaartitseqataapput.

- Ingasappoq

Filmeeraliami ”Ivalu”-mi ataataasutut inuttaasumut Angunnguaq Larsenimut oscarimik nersornaasiisoqarneranut peqataanermi misigisaq annertoqaaq.

- Nuannattorsuaqarpoq, inuillu tamarmik kusassarsimasut takullugit misigisaq angeqaaq, sumi tamaanilu assiliiveqarpoq. Ingasappoq. Nuanneqaaq, taanna oqarpoq.

Naak ”Ivalu” nersornaaserneqanngikkaluartoq, innersuunneqarnera isumalerujussuuvoq, taanna oqaluttuarpoq.

Matunik ammaasinnaanissaa neriuutigigaa

- Taama annertutigisumik angusaqarsinnaaneq, tassa allaat innersuunneqarluta maanga killinnerput kalaallit filmiliaannut isumalerujussuuvoq. Nunatsinni filmiliornermik suliaqartunut periarfissanik ammaassisinnaassasoq neriuutigaara, taanna oqarpoq.

Angunnguaq Larsen assigalugu Rebecca Pruzanip filmimi ingerlatsiup, Hollywoodimiinnini nuannaarutigaa.

- Ukioq manna filmitsialak peqatigalugu innersuunneqarnermut nuannaarutigaarput. Maanna suleqatigullu nuannappugut, maaniinnerpullu nuannaarutigalugu, taanna oqarpoq.

Filmi misigisalersaarut ajugaasoq

Nersornaasiinermi filmi "Everything Everywhere All at Once" annermik ajugaavoq.

Filmi taanna immikkoortuni aqqanilinni innersuunneqarpoq, tassanilu arfineq-marlunnik nersornaaserneqarpoq.

Taakku ilagaat nersornaatini annersaasut ilaat – tassa Filmitsialattut toqqarneqarluni. Filmimi isiginnaartitsisut aamma nersornaaserneqarput.

Michelle Yeoh arnani pingaarnertut inuttaalluarnerpaatut nersornaaserneqarpoq. Siullermeerluni Asiamiumik tassani nersornaasiisoqarpoq.

Tamatuma peqatigisaanik Jamie Lee Curtis aamma Ke Huy Quan Arnani aamma Angutini Inuttaaqataalluarnerpaatut nersornaaserneqarput.