Ivaaraq pillugu suliaq: Sumiginnagaasutut misigisimasoq
Maibritt Lothsen, Kujataani arnamut annertuumik innarluuteqartumut meerartaartumut anaanaasoq, misigisimanngilaq pisup amiilaarnartup kingornagut ulloq unnuarlu angerlarsimaffimmi Ivaaqqami allanngortoqarsimasoq.
- Paniga inigisimasaminut uterpoq. Iniusinnaavoq atornerlugaaffigisaa, Maibritt Lothsen oqaluttuarpoq.
Aviisi AG taama allappoq.
Arnamut annertuumik innarluuteqartumut siorna ernisumut anaanaavoq – naartunersoq sulisunit qanigisaasunilluunniit paasineqarani. Maibritt Lothsenip arlaleriarluni sulisut qinnuigisarsimavai panini ineeqqamut allamut nooqqullugu. Innarluutilinnut ingerlatsivik Ivaaraq marlunnik immikkoortortaqarpoq – immikkoortortaq Tungujortoq meeqqanut inuusuttunullu naatsorsuussaq kiisalu Sungaartoq inersimasunut naatsorsuussaasoq.
- Piumasarisimavara illumut allamut nuutsinneqassasoq. Panimmami misigissutsini oqaluttuarisinnaanngilai, kingunerluuteqartinneqaqqissagaluarpallu susoqassava? Taamaattumik nuunneqarnissaa tamanut pitsaanerpaavoq. Taamaattoqarsinnaannginnera akuerineqarsinnaanngilaq, Maibritt Lothsen oqarpoq.
Tamanna pisinnaanngimmat anaanaasup ingerlatsivimmut qinnutigaa panini immikkut paarineqalissasoq peqqissaavimmit uteruni. Maibritt Lothsen naapertorlugu tamanna pinngilaq.
- Misigisimavunga sulisunit suusupagineqarlunga, anaanaasoq oqarpoq nangillunilu:
- Naalakkersuisut piumasaraat nangilerneqarnerani, isumagineqarnerani asanneqarneranilu tamatigut sulisut marluussassasut. Tassaniittarninni taama pisoqarsimanngilaq, Maibritt Lothsen oqarpoq.
Aviisimi AG-mi atuarnerusinnaavutit. Aviisi uani pissarsiariuk:
