Ivaaraq pillugu suliaq: Politiit suli paasiniaapput
Angut 62-inik ukiulik Qaqortumi Ivaaqqami arnamik 22-nik ukiulimmik annertuumillu innarluuteqartumik kinguaassiutitigut atornerluilluni nassuereeraluartoq, taamaattoq politiit paasiniaanertik siammasissumik suli ingerlappaat.
Qaqortumi Ivaaqqami kinguaassiutitigut atornerluisoqarsimanera pillugu politiit siammasissumik suli paasiniaapput.
Paasiniaanermi aqutsisoq, Julie Senderovitz Bendtsen Sermitsiaq.AG-mut ilisimatitsivoq.
- Oqarsinnaavunga suliami siammasissumik paasiniaaneq suli ingerlakkatsigu. Suliani taama ittuni paasiniagassat tamakkerluinnarlugit sulisariaqarpugut. Soorpiaat paasiniarneqarnersut itisilersinnaanngilakka, Julie Senderovitz Bendtsen oqarpoq.
Allanik pasisaqartoqarnersoq oqaatigisinnaanngilaa, allanillu pinerluttoqarsimanersoq aamma oqaatigisinnaanagu. Arnaq 22-nik ukiulik, annertuumik innarluuteqartoq, najukkami kinguaassiutitigut atornerlungaasimasoq paasineqareerpoq.
Angut tigusarineqartoq
Kalaallit Nunaata Politiivi pingasunngornermi 2. november ilisimatitsissutigaat atornerluisoqarsimanerani angut tigusarineqarsimasoq. Arnaq 22-nik ukiulik 2. september meerartaarpoq, naartunera ilisimaneqarsimanngilaq. Arnaq innarluuteqarnini pissutigalugu oqalussinnaananilu pisussinnaanngimmat, kinguaassiutitigut atornerluisoqarsimaneranik paasiniaaneq politiit erngertumik aallartippaat. Angullu tigusarineqartoq meeqqap DNA-vata angutillu DNA-vata misissornerani paasineqarsimavoq pinerlisuusoq.
Julie Senderotz Bendtsen paasiniaanerup ingerlanneqarnera pissutigalugu, angutip Ivaaqqamut qanoq attuumassuteqarnera oqaatigisinnaanngilaa.
Kalaallit Nunaata Politiivisa ilisimatitsissutiginikuunngilaat angutit qassit DNA-mik misissuiffigineqarsimanersut.
Suliaq naammassillugu unnerluussisussaatitaasumut qaqugu tunniunneqassanersoq oqaatigiuminaappoq.
- Paasiniaaneq pisariaqartillugu ingerlatissavarput, misissugassallu tamaasa misissorlugit. Misissugassat tamaasa qulaajarlugit qulakkeerutsigu aatsaat naammassiumaarpugut, paasiniaanermi aqutsisoq oqarpoq.