Ivaaraq pillugu suliaq: Ilaqutariit sumiginnagaasutut misigisimatitaapput

Nukappiaqqap aanaa, Maibritt Lothsen, nukippassuarnik atuisitaajuarsinnarpoq, tassami siullermik tuparujussuartitaavoq paasigamiuk panini annertuumik innarluutilik Linda ulloq unnuarlu angerlarsimaffimmi Ivaaqqami Qaqortumi najugaqartoq, imminut illersoriarsinnaanngitsoq kinguaassiutitigut atornerlunneqartarsimasoq qitornartaariataarneratigut paasineqarmat.

Nukappiaqqap naatsorsuutigisaanngitsumik inunngoriasaarnerata malitsigisaanik ilaqutariit misigissutsikkut sakkortuumik nalaataqartitaanerisa nalaani, pisortat sukkaannaq aalajangersaapallassimapput.

Taamatulli aalajangersaasoqarsimanera nukappiaqqamut aanaasup Maibritt Lothsen-ip sianigisaqarfiginngilaa, tassami pisup nalaani tuparujussuartitaanikuugami nukinilu tamaasa atorlugit panini annertuumik innarluuteqartoq illersorniarlugu tamaviaaraluarpoq, taamaattorli aallaqqaammulli pisortat ilaqutariinnut eqqugaasunut illersuisutut pissusilersornatik akerlilersuisutut pissusilersortutut misigititsisimammata:

- Aallaqqaammulli, paaseqqaarakkuli ulloq unnuarlu angerlarsimaffimmi illersugaalluni paarineqarfissaraluamini paniga kinguaassiutitigut atornerlunneqartarsimasoq, taamanili pisortanit misigitinneqarpunga sinaanut ajattaannagassatut oqaasissaqartitaanngitsutullu, taamak Sermitsiaq.AG-mut oqaluttuarpoq Maibritt Lothsen nangillunilu:

- Soorunami tuparujussuartitaavunga ernutara inunngoriasaarmat, piffissamilu siullermi pisoq pillugu eqqarsaatigilluakkamik qanoq qisuariaateqarsinnaanera annikitsuararsuuvoq, panimmalu qitornartaariasaarnera pillugu tuparujussuaqqavunga. Tassanngaaniilli pisortat, uanga ilisimanngisannik ernuttama uagutsinnit peerneqarnissaanik pisortanit aalajangersaasoqarsimanera ajorsartitaasutut misigisimatitaareernitta qaavatit aamma ajorsartitaaqqittutut misigititaaqqippugut.

Qaammatit qulit qaangiummata ilisimatinneqarpoq

Sermitsiaq.AG takunnippoq allagaammik tassanilu nukappiaqqap inunngornerata kingorna ullut aqqanillit qaangiutiinnartut erseqqissarneqarpoq Kommune Kujalleq aalajangersimasoq allamik angajoqqaatut oqartussaasuseqartussamik toqqaasoqassasoq, tassunga pissutaatinneqarluni "Maibritt Lothsen oqarsimammat nammineq soqutiginngikkini nukappiaqqamut suli atserneqanngitsumut angajoqqaatut oqartussaassuseqalernissaminut..."

Illuatungaani aanaasoq Maibritt Lothsen aalajangersaasoqarnerata nalaani ilisimatinneqaranilu sianigisaqanngilaq nukappiaraq ilaqutariinnit ataavartumik avissaartinneqassasoq kommunimit siunniunneqarsimasoq:

- Uagutsitulli nalaataqartoqarsimassaguni, taakku immaqa kisimik paasisinnaavaat naatsorsuutiginngilluinnakkamik taamatut pisoqarnera qanoq annertutigisumik tuparujussuarnermik nassataqarnersoq. Imaassinnaavoq paatsuunganartumik arlaannik oqaaseqarsimasinnaasunga ernutara attuumassuteqarfigerusunngikkigamik paasineqarsinnaasumik, tamannali ilumuunngilaq, tassami piffissami siullermi paniga pillugu annertuumik tamaviaarpunga piumasarigaluarlugulu angerlarsimaffimmit tassannga qimagutissasoq, tassami tassani kanngutsaatsiliorfigineqarlunilu atornerlunneqartarsimasoq paasivarput qitornartaariasaarmat, toqqissisimanngilluinnarpungami paniga imminut illersoriarsinnaanngitsoq taamak nalaataqartitaasimammat. Qaavatigulli aamma pisortat pisoq tamanna atorlugu sukkasoorujussuarmik aalajangersaasimanerat qanoq pisinnaasimanersoq takorloorsinnaanngilaraluunniit, aatsaallu qaammatit qulit qaangiummata qanoq aalajangiisoqarsimanera pillugu ilisimatinneqarpunga ernutara meeqqanut ulloq unnuarlu angerlarsimaffimmut nassiunneqarsimasoq.

Ilisimatinneqarpoq nukappiaraq DIH-mi misissortikkiartuinnassasoq

Nukappiaraq inunngitsiaannartoq Maibritt Lothsen tuparujussuartitaasimanini qaangersinnaaniarlugu tarnip pissusiinik ilinniarsimasumik oqaloqateqartarpoq. Taamatut oqaloqatiginneruttortoq tassanngaannaq sianerfigineqarpoq ilisimatinneqarlunilu nukappiaraq Dronning Ingridip napparsimavissuanut misissorneqartussaammat Nuummukartinneqalersoq, misissorneqarnissaanullu pissutaasoq anaanaa annertuumik innarluuteqarlunilu noqartartuummat.

- Suliamik ingerlatsisumit ilisimatinneqarpunga ernutara Nuummukaanneqalersoq misissorneqassammat arlaatigut kingornuttakkamik nappaateqarsimassappat paasiaarneqarniassammat. Arlaannaatigulluunniit ilisimatinneqanngilanga ernutara misissorneqaannassanngitsoq aammali meeqqanut ullqo unnuarlu angerlarsimaffimmut nuutsitaasussanngorsimasoq. Tamanna aatsaat qaammatit qulit qaangiummata paasivara allagaq uannut tunniunneqarmat.

Neriorsorneqaraluarpoq piareeruni meeraq tigussagaa

Maibritt Lothsenip killiffimmi pisortat suliaq pillugu sullissinerat pillugu tatiginnissinnaanera kiisa annikitsuararsuanngorpoq. Taannami oqaluttuarpoq neriorsorneqarsimalluni piareeruni ernuttani tigusinnaagaa.

- Paasiuminaatseqaara aallaqqaataaniilli ikiorneqarata akerlilersorneqartutut inissisimatinneqaannavinnerput pillugu, allaalluunniimmi ilaanni misigisimanartarpoq uagut ajortuliorfigineqarata ajortuliorsimasugut. Tassami paniga ernutaralu illersorniarlugit tamaviaaraluarlunga qammarsuarmut aportinneqartutut misigisimatinneqqaannavippunga. Neriorsorneqaraluarpungami ernutara tigujumaariga piareeruma, allakkalli ersersippaa pisortat ernuttama inunngornerata kinguninngua aalajangeereersimasut meeraq uagutsinnit peerneqassasoq, taannalu nalaatatsinnit anniartitaanitta qaavatigut anniartitaaqqinnertut misinnarpoq, Maibritt Lothsen Sermitsiaq.AG-mut oqaluttuarpoq nangillunilu:

- Manna tikillugu arlaleriarlunga ernutara tiguniarlugu pisortanut saaffiginnittaraluarpunga. Pingaaruteqarluinnarpormi ernuttama sapinngisamik siusissukkut paasinninnissaa anaannani annertuumik innarluuteqartuusoq, taamaammallu aamma anaaani annertuumik innarluuteqarmat tamakkiisumik najorsinnaanngikkaluarlugu ulluinnarni takusarlugu peroriartornissaa pingaaruteqarpoq, taamaammat panimma atornerlunneqartarsimanera pillugu tuparujussuaqqanera qaangiummat, erngertumik ernutara tigorusullugu pisortanut saaffiginnittaraluarpunga, isumagerusukkakku ernuttama anaanaminut ataavartumik attaveqarnissaa, taamaattorli ataatsimoorsinnaanissarput pisortanit pinngitsoortinniarneqartutut misinnarpoq, nukappiaqqamut naatsorsuutiginngilluinnakkamik, anaanaata annertuumik innarluutillip Lindap illersorneqarluni najugaqarfigisassamini ulloq unnuarlu angerlarsimaffimmi kinguaassiutitigut atornerlunneqartarnerata kingorna inunngoriataarnikuusumut aanaasoq ilungersoqaluni oqaluttuarpoq.

Sermitsiaq.AG-mit sulissutigaarput Kommune Kujallermit oqaaseqartitsiniarluta, ilaatigut akissutissarserusullugu nukappiaqqap anaanaminit ilaqutai aammalu ilaqutariit kommunerisaat, Avannaata Kommunia avaqqullugit sooq taamak aalajangiisuutigisumik aalajangersaasoqarsimanersoq.