Ivaaraq pillugu suliaq: Arnamik najugaqartumik atornerluisoqarsimaneranik misissuineq naammassineqarpoq
Arnap innarluutillip septembarimi innarluutillit najugaqarfianni Ivaaqqami meerartaartoq pillugu suliap unnerluussisussaatitaasunut tunniunneqannginnerani, Kalaallit Nunaanni Politiit misissuinernit kingullernit inernerit utaqqivaat.
Arnaq 23-nik ukiulik innarluutilik oqalussinnaananilu pisussinnaanngitsoq, Kujataani innarluutillit angerlarsimaffianni Ivaaqqami erninera, septembarimi saqqummiunneqarmat nuna tamakkerlugu tupassutigineqarpoq.
Qaammatit marluk qaangiuttut angut 62-nik ukiulik tigusarineqarpoq, arnamullu najugaqartumut pinngitsaaliisimasutut pasineqarluni unnerluutigineqarpoq. Taassuma meeqqallu akornanni DNA-mik assigiittoqarnera uppernarsaatini pingaarnersaavoq. Angutip taamanikkut arnaq 22-nik ukiulik pinngitsaalillugu atoqatigisimallugu, aqaguani tunngaviusumik inatsit malillugu killisiuinermi nassuerutigaa.
Maanna qaammatit arfineq-marluk qaangiuttut suliami nutaarsiassaqalerpoq.
Suliamik misissuineq naammassineqartoq, politikommissær Julie Senderovitz Bendtsen, Kalaallit Nunaanni Politiini kannguttaatsuliornerit pillugit suliassaqarfimmi aqutsisoq ilisimatitsivoq.
Akisussaaffik tamakkiisoq
Taanna ilanngullugu oqarpoq:
- Maanna misissuinernit kingullerni inernerit taamaallaat utaqivagut. Inernerit kingulliit tigugutsigit suliaq unnerluussisussaatitaasunut tunniunneqassaaq, taakku inatsisitigut nalilersuissapput.
Politikommissærip maannamut suliaq pillugu oqaaseqaqqissinnaanngilaq.
Sermitsiaq.AG-p Isumaginninnermut Aqutsisoqarfimmit, innarluutilinnut paaqqinnittarfimmut Ivaaqqamut tamakkiisumik akisussaasuusumit oqaaseqartitsiniarlui sulissutigaa, ilaatigut suliamut atatillugu qanoq sukaterisoqarsimanersoq aamma iliuuseqartoqarsimanersoq paasiniarlugu.