Ivaaraq pillugu suliaq eqqartuussivimmi: Sulisuusimasoq atornerluisimasutut pisuutinneqarpoq
Angut 62-inik ukiulik inuit innarluuteqartut najugaanni Ivaaqqami, najugaqartumut kinguaassiutitigut atornerluisimasutut Kujallermi Eqqartuussivimmi eqqartuunneqarami pisuutinneqarpoq.
Ivaaqqami najugaqartoq arnaq innarluuteqartup meerartaareerneranit ukioq ataaseq sinnerlugu qaangiussimalersorlu suliaq eqqartuussivimmi suliarineqarluni naammassineqarpoq.
Kujallermi eqqartuussiviup Ivaaqqami sulisuusimasoq, angut 62-inik ukiulik ukiuni marlunni qaammatinilu qulingiluani pineqaatissinneqarsimasunut inissiisarfimmiittussanngorlugu eqqartuuppaa. Taamaasilluni unnerluussisussaatitaasup piumasaraa malinneqarpoq.
Angut 62-inik ukiulik arnamik innarluuteqartumik marloriarluni, juullip ukiortaallu akornanni 2021-mi atoqateqarsimanerminik eqqartuussivimmi nassuerpoq.
Angut kinguaassiutitigut atornerluisutut aamma inummut innarluuteqarnini pissutigalugu imminut illersorsinnaanngitsumut atoqateqarsimasutut eqqartuunneqarpoq.
Suliaq eqqartuussivimmi naammassineqaraluartoq, taamaattoq Ivaaqqami suliaq inuiaqatigiinni suli oqallitsitsingaatsiartarpoq.
Atornerlunneqarnermini naartulersoq
Angut eqqartuussaasussaatillugu unnerluussummi nassuiarneqarpoq angut 15. november 2021-mit 1. januar 2022-p tungaanut arnamik arlaleriarluni atornerluisimasutut unnerluutigineqartoq. Atornerluinerit pipput angut Ivaaqqami sulisuunerata nalaani.
Kinguaassiutitigut atornerlunneqarnermini arnaq innarluutilik naartulerpoq. Arnaq oqalussinnaanngilaq, innarluuteqaramilu avatini atorsinnaanagit, taamaasilluni imminut illersorsinnaanani.
Misissuinermi DNA-p misissornerani paasineqarpoq angut 62-inik ukiulik, arnap septemberimi siorna meerartaarisaanut ataataasoq.
Sulisinnaanermut pisinnaatitaaffiiarneqartoq
- Ukiut marluk aamma qaammatit qulingiluat pineqaatissinneqarnissaanik piumasarput eqqartuussiviup malimmagu tamanna takussutissaavoq pinerlunneq imaannaanngitsuusoq. Angut arnamik innarluuteqartumik, imminut illersorsinnaanngivissumik, atornerluivoq. Angut nassueruteqarpoq unnummi ataatsimi marloriarluni atoqatiginnissimalluni, tamassumalu kinguneraa arnaq naartulersoq meerartaarlunilu, unnerluussisussaatitaasoq Lars Petersen Sermitsiaq.AG-mut oqarpoq.
Unnerluussisussaatitaasup ilanngullugu piumasaraa 80.000 koruuninik taarsiisoqassasoq. Eqqartuussiviulli aalajangerpaa 150.000 koruuninik taarsiisoqassasoq. Unnerluussisussaatitaasup ilanngullugu piumasaraa angut ukiuni tallimani, angerlarsimaffinni illersungaasuni najukkaniluunniit allani, inuit innarluuteqartut najugaanni sulisinnaatitaassanngitsoq. Tamanna eqqartuussiviup aamma malippaa.