Ivaaqqamut suliaq pillugu oqaaseqaateqarpoq: Sulisunik pisuutitsineq inuit naapittarfiisigut oqallinneq mianersuunneqarli
Kommune Kujallermi borgmesterip Stine Egedep (IA) kaammattuutigaa sulisunik pisuutitsinermik kamammillu inuit naapittarfiisigut oqallinneq mianersuuteqqullugu. Qaqortumi annertuumik innarluutilik Ivaaqqami meerartaareersoq taamatut oqariartuuteqarpoq.
Ivaaqqami alianaqisumik pisoqarnera kikkunnut tamanut nalunanngitsumik misigissutsikkut sakkortuumik eqquivoq, Kommune Kujallermi borgmesteri Stine Egede (IA) allagaqarpoq.
Ivaaraq piffissami kingullermi sammineqangaatsiarpoq. Ulloq unnuarlu angerlarsimaffimmi najugaqartoq - arnaq inuusuttoq 23-nik ukiulik annertuumillu innarluuteqartoq - naartulerpoq, naartusimanera sulisunit ilisimaneqarsimanani. Suliaq kinguaassiutitigut atornerluisoqarsimaneratut politiinit maanna paasiniarneqarpoq, arnarmi oqalussinnaananilu pisussinnaanngilaq.
Suliaq pillugu tusatsiakkat innuttaasuni ingerlaarput. Taamaattumik borgmesterip kaammattuutigaa sulisunik pisuutitsinermik kamammillu inuit naapittarfiisigut oqallinneq mianersuuteqqullugu:
- Kaammattuutigissavara sulisunik pisuutitsinermik kamammillu inuit naapittarfiisigut oqallinneq mianersuuteqqullugu. Eqqaamassagatsigu pisortat suliassartik suliarimmassuk eqqartuusisullu suliamik inerniliisussaammata.
Egede: Sulisut imaannaanngitsumik aqqusaagaqarput
Ivaaqqami sulisut ajunngitsumik pineqassasut borgmesterip neriuutigaa.
- Pisimasoq alianaqisoq neriuppunga inuiaqatigiinni ataatsimoorluta nukittorsaqatigiikkumaartugut, qularinngilarami amerlasuut ikiminnik/anniaatiminnik qaffattoortitsisimassasut.
- Neriuppunga sulisunik nakkarsaanermik pilersitsisoqassanngittoq. Sulisummi aamma nuanniilliorput, tujormillutillu, borgmester allappoq.
Naalakkersuisut siusissukkut ilisimatitsisut
Pisimasoqarneranik Naalakkersuisumit siusissukkut ilisimatinneqarsimallutik, angerlarsimaffillu pineqartoq namminersornerusunit ingerlanneqarpoq.
Kommuunitut isumaginninnermik suliaqartut sukumiisumik sukkasuumillu suliarisariaqakkaminnik suliaqartut ilisimatitsivoq.
- Eqqugaasut uummammik pisumik nukissaqartitaanissaannik kissaappakka, oqarpoq.