Ivaaqqamik suliaq: MIO Tiliorlu atornerluisoqarsinnaaneranut illersuiniarluni iliuuseqaqqusisut
Namminersorlutik Oqartussat ulloq unnuarlu angerlarsimaffinni najugaqartunik atornerluisoqarsimatillugu suleriaasissat pillugit nassuiaammik ujartorneqartumik suli tunniussaqarsimanngitsut, Inuit Innarluutillit Illersuisuannit oqaatigineqarpoq.
Politiit arnamik annertuumik innarluutilimmik Qaqortumi innarluutillit angerlarsimaffianni Ivaaqqami naartulersimasumik suliamut atatillugu angummik 62-inik ukiulimmik pinngitsaaliilluni arneriffiginnissimasutut pasineqartumik sapaatip-akunnerani matumani marlunngornermi tigusarinnipput.
Pisinnaatitaaffinnik sullissivinnit marlunnit, MIO-mit Tiliumillu, meeqqanik inunnillu innarluutilinnik sullitaqartunit, suliaq alaatsinaaqqissaarneqarsimavoq.
Illersuisut taakkua ataatsimoorussamik oqaaseqaammi oqarput, suliaq inunnik innarluutilinnik inissinneqarsimasunik illersuinermi oqartussat sumiginnaasimanerannik apeqqummik sualuttumik pilersitsisoq, oqartussallu pisoq pillugu akisussaaffimmik tigusisariaqartut ingerlaannarlu iliuuseqarlutik, sumiginnaanermik pisoqaqqeqqunagu.
Ilaqutaasut pisinnaatitaaffii ersarissarneqassapput
- Tilioq aamma MIO oqartussanut kaammattuipput akisussaaffimmik tiguseqqullugit iliuusissanillu, inuit innarluutillit atornerlunneqarnissamut, nakuuserfigineqarnissamut kinguaassiuutitigullu atornerlunneqarnissamut illersorneqarnissaannik qulakkeerinnittunik, aallartitseqqullugit. Tamatuma peqatigisaanik oqartussat angajoqqaat ilaqutaasullu suliani ilaquttamik sumiginnarneqarfigisaanni pisinnaatitaaffiinik ikorfartuinissamullu periarfissaannik ersarissaasariaqarput, sullissiviit taakkua marluk ataatsimoorussamik oqaaseqaammi allapput.
Tamatumunnga atatillugu inuit innarluutillit illersuisuat Anja Hynne Nielsen uparuaalluni oqarpoq, Tilioq Isumaginninnermut Aqutsisoqarfimmit ulloq unnuarlu angerlarsimaffinnut inuit innarluutillit innarlerneqarnissamut kinguaassiuutitigullu atornerlunneqarnissamut illersorneqarnissaannik qulakkeerinninniarluni najoqqutassat suliniutillu suut nassaassaanerinut nassuiaammik ujartorneqarsimasumik suli tigusaqarsimanngitsoq.
- Nunatsinni ulloq unnuarlu angerlarsimaffinni tamani pissutsinik misissuisitsinissaq pisariaqarpoq. Kisianni maannakkut iliuuseqarnissaq aamma pisariaqarpoq.
Aqutsisoqarfiup pisortaa pitsanngoriaatissanik oqaloqatiginnissuteqarsimasoq
- Ivaaqqami, nunatsinnili inunnut innarluutilinnut ulloq unnuarlu angerlarsimaffiit najugaqarfiillu sinnerini aamma, kinguaassiuutitigut atornerluinernut illersorneqarnissamut suleriaatsinik nutartikkanik, ulloq unnuarlu angerlarfinni atuutilersinneqarsimasunik, nassaassaqarnissaa taakkualu tamanit ilisimaneqarnissaat nutartertuarneqarnissaallu oqartussat isumagisariaqarpaat, Anja Hynne Nielsen ataatsimut oqaaseqaammi oqarpoq.
Isumaginninnermut Aqutsisoqarfiup Ivaaraq akisussaaffigaa, aqutsisoqarfiullu pisortaa Helene Berthelseni siusinnerusukkut Sermitsiaq.AG-mut oqarsimavoq, Ivaaqqami sulisut peqatigalugit assingusumik pisoqaqqissinnaanera pinaveersimatinniarlugu suliniutissat assigiinngitsut oqaluuserineqarsimasut, ksianni nanginik taarsiinermi uffaanermilu inuit marluusarnissaannik unnuarsiornermilu inuit marluusarnissaannik najoqqutassaqareersoq.
Politiit naapertorlugit arnap innarluutillip meeraata angutillu 62-inik ukiullip DNA-vi assigiissuteqartut, tamannalu angummik tigusarinninnermik kinguneqarsimasoq. 62-inik ukiulik eqqartuussisoqarfimmit pingasunngornermi ulluni 22-ni tigummigallagassanngortinneqarpoq.