Ivaaqqamiittuutillit: Suli toqqissisimanngilagut
Ivaaqqami sulisut ikippallaarujussuarnerat, angajoqqaat Ivaaqqami najugaqartuutillit toqqissisimassutiginngilaat. Angajoqqaat ammasumik allakkiaminni oqaatigaat politikkikkut suliaqanngittoqarpallaartoq, qanoq iliuuseqartoqarnissaanillu piumasaqarlutik.
Inuit innarluuteqartut angerlarsimaffii politikerinit aallunneqanngippallaarput.
Angajoqqaaqatigiit Ivaaqqamiittuuteqartut taama isumaqarput. Angajoqqaat arfiniliusut iliuusissanik arlalinnik piumasaqarlutik ammasumik allakkiorput.
- Angajoqqaatut ilisimavarput Ivaaqqami ulluunerani sulisut pingasuinnaasartut. Taamaasilluta takusinnaareerparput sulisut marluk nangilersuinermi eqqiluisaartitsinermilu peqataajuarnissaannik piumasaqarneq maannakkut naammassiuminaatsuusoq, piviusorsiunngitsorlu, arnamut innarluuteqartumut angajoqqaaq Ivaaqqami najugaqartuutilik Arnanguak Schmidt Sermitsiaq.AG-mut oqarpoq.
Taanna oqaluttuarpoq nangilersuinermi, eqqiluisaartitsinermi unnuakkullu paaqqutarinnittuni ikinnerpaamik sulisut marluusarnissaanik malittarisassaqarneq qangaaniilli atuutereersimasoq.
- Naammaginanngilluinnarpoq allanik susoqanngitsoq, septemberimi pisoqareerneranit, oqarpoq.
Pitsannguutissanik arlalinnik piumasaqartut
Angajoqqaat Ivaaqqamiittuuteqartut septemberip aallartinnerani ilisimatinneqarput najugaqarfimmiittoq ataaseq, naartusoq ilisimaneqarsimanngitsoq meerartaarsimasoq. Najukkamilu kinguaassiutitigut atornerluisoqarsimasinnaaneranik paasiniaaneq aallartinneqarsimasoq.
Najugaqartut isumannaatsumik inissisimanissaat pillugu suliniutinik takussaasoqannginnera angajoqqaaqatigiit erloqinartikkaat, Arnanguak Schmidtip oqaatigaa. Ulloq unnuarlu najukkami pitsanngorsaatissanik arlalinnik angajoqqaaqatigiit piumasaqarput.
Ilaatigut piumasaraat Ivaaqqap immikkoortortaqarfii illoqarfinnut allanut nuunneqarnissaat, Qaqortumi sulisussaqannginneq pissutigalugu. Sulisut amerlanerunissaat, eqqiluisaarnermi suliani sulisut marluusarnissaanut qulakkeerinnissinnaasoq, aamma piumasaraat, najukkallu pitsaanerusumik nakkutilliivigineqarnissaat aamma piumasaralugu.
Nakkutilliineq naammaginanngitsoq
- Nunatsinni inuit annertuumik innarluuteqartut pillugit ilisimasat annikippallaarujussuarput. Ilisimasakinnerlu nakkutilliinerup naammaginannginneranik aamma takutitsivoq. Meeqqagut, tassa Ivaaqqamiittut, annertuumik innarluuteqarnertik pillugu oqartussaasuunerat killeqarpoq, uagullu inersimasunngoraluarpataluunniit suli angajoqqaatut akisussaaffimmik tigumminnittuuvugut. Nakkutilliisoqartillugu angajoqqaajusugut saaffigineqanngisaannarpugut, taamaattumillu najugaqartut qanoq innerat pillugu nakkutilliisut naammanngitsumik pissarsisarput, Arnanguak Schmidt oqarpoq.
Arnanguak Schmidtip erseqqissarpaa Ivaaqqami aalajaallutik sulisut angajoqqaaqatigiinnit qujamasuutigineqartut, sulisulli amerlanerusariaqaraluartut najugaqartut sammisaqartittarnissaat anguniarlugu.
- Najugaqarfik najugaqartut qanoq innerat ukkatarinerusariaqarpaat, najugaqarfiinnartut atornani. Nerisaqartitsineq, nangilersuineq sinitsitsinerlu kisimik naammanngillat, oqarpoq.
Meeqqanut, inuusuttunut ilaqutariinnullu naalakkersuisoqarfimmi pisortaq Heidi Lindholm Sermitsiaq.AG-mut ilisimatitsivoq naalakkersuisoqarfik angajoqqaanut akissuteqarluni suliaqartoq, akissutissarlu angajoqqaanut toqqaannartumik nassiunneqarumaartoq.