Ivaaqqami pisoq: Angut 62-inik ukiulik arnamik innarluuteqartumik atornerluisimalluni nassuerpoq
DNA atorlugu misissuinerit aallaavigalugit Kalaallit Nunaanni Politiit angut 62-inik ukiulik arnamik annertuumik innarluuteqartumik, Qaqortumilu Ivaaqqami ineqartumik kinguaassiutitigut atornerluisimasutut pasillugu tigusaraat.
Arnaq 22-nik ukiulik annertuumik innarluuteqartoq, Qaqortumilu Ivaaqqami ulloq unnuarlu angerlarsimaffiusumi najugaqartup kinguaassiutitigut atornerlunneqarsimaneranut tunngatillugu angut 62-inik ukiulik Kalaallit Nunaata Politiivinit marlunngornermi unnukkut tigusarineqarpoq.
Kalaallit Nunaanni Politiit tusagassiorfinnut taama nalunaaruteqarput.
Suliaq saqqummeqqaarmalli qanimut Sermitsiaq.AG-mit malinnaavigineqarsimavoq. Arnaq annertuumik innarluuteqartoq qaammatit marluk matuma siorna ernertaarpoq. Erninissaata tungaanut naartusoq ilisimaneqarsimanngilaq. Arnaq pisussinnaanngilaq oqalussinnaananilu, taamaattumillu pisoq kinguaassiutitigut atornerluisoqarsimaneratut sulianngorlugu politiinit paasiniaaffigineqarpoq.
Tigusarineqartup inunnguutsimigut aavani allannguutai, meeqqallu inunngortup aavani allannguutai, DNA-t assigiiffeqarluarmata, tamanna uppernarsaatitut atorlugu angut tigusarineqarpoq.
Politikommissær Julie Senderovitz Bendtsen, Kalaallit Nunaata Politiivi sinnerlugit kinguaassiutitigut kannguttaatsuliortoqarsimaneranik paasiniaasartut immikkoortortaqarfiani aqutsisuusoq taama ilisimatitsivoq.
- Paasiniaanerup aallartissimalernerani suliami pasineqarsinnaasut arlallit DNA-vinik misissugassanik tigusivugut. Angutit, arnamik qanimut attaveqarsimasinnaasut tamakkerlugit suliami pasisaasinnaanerat aallaavigalugu suliaq aallaqqaataaniilli ingerlapparput.
Tigusarineqartup DNA-va assigaa
Paasiniaanermi pisortaq ilassuteqarpoq:
- Ilisimalluinnarparput suliami killisiorneqartunut misissugassamillu tigusiffigineqartunut tamanut suliaq sakkortusimasoq. Taamaaliortariaqarsimavugulli arnaq pinerlineqartoq nammineerluni politiinut oqaluttuarsinnaanngimmat, Julie Senderovitz Bendtsen oqarpoq nangillunilu:
- DNA-t misissugassat tamakkerlugit pissarsiarigatsigit Danmarkimut Retskemisk Institutimut misissugassanngorlugit nassiuppagut. Taakkununnga ilaatillugu meeqqap anaanaasullu DNA-vi misissugassat. Taamaasilluta qulakkeerlugu akissutisivugut, angullu pasisaq tigusaralugu. Misissorneqartut sinneri pasisatut inissisimanngillat.
Tigusarineqartoq arnamik 22-nik ukiulimmik kinguaassiutitigut atornerluisimanera pillugu inatsit tunngaviusoq tunngavigalugu pingasunngornermi killisiorneqarpoq. Killisiorneqarnerminilu nassuerutigaa arnamik 22-nik ukiulimmik kinguaassiutitigut atornerluisimalluni. Eqqartuussivimmi killisiuneq matoqqasumik ingerlanneqarpoq, kinalu tigummigallagaanersoq taaneqassanngitsoq eqqartuussiviup aalajangersimavaa. Eqqartuussiviup aalajangerpaa angut ulluni 22-ni tigummigallarneqassasoq.
Politiit suliaq pillugu inuit suliamut attuumassuteqarsinnaasut arlallit aamma killisiorsimavaat, suliarlu suli paasiniarneqarallassaaq. Suliaq naammassippat unnerluussisussaatitaasumut suliakkiunneqassaaq.