Ivaaqqami najugaqartumut anaanaasoq: Tatiginninneq annikilliallappoq
Suffi Markussenip qitornaa Ivaaqqami najugaqartuuvoq, ulloq unnuarlu angerlarsimaffiusumi atornerluisoqarsimanera pillugu tupaqqavoq. Sulisut suli tatigai, qitornaatami pisariaqartitai aallaavigalugit sullinneqarpoq.
Suffi Markussen Ivaaqqami najugaqartumut anaanaavoq. Ulloq unnuarlu angerlarsimaffimmi najugaqartumik 23-nik ukiulimmik atornerluisoqarsimanera saqqummiunneqaqqammerpoq. Suffi Markussen suliaq pillugu mailikkut paasitinneqarpoq.
- Atuarakku ernumaammertorujussuuvunga, allagarsiaralu arlaleriarlugu atuareerakku aatsaat paasilluarpara susoqarpiarsimanersoq. Allagarsiara atuareerakku eqqarsaaterpassuit apeqquterpassuillu takkussuupput, Suffi Markussen Sermitsiaq.AG-mut oqarpoq.
Pania innarluuteqartoq Ivaaqqamut 2015-imi nuunnissaata tungaanut ukiuni 16-ni isumaginikuuaa. Sulisorineqartut tatigalugillu angerlarsimaffiup ingerlanneqarnera naammagisimaarlugu oqaluttuarpoq. Suliarli takkummat ulloq unnuarlu angerlarsimaffimmut tatiginninnera annikilleriaqqaarpoq.
- Sulisut tatigilluinnarpakka. Paniga paarilluarnikuuaat, mailili atuarakku tatiginninnera peerukkaluarpoq, oqarpoq.
Allanik periarfissaqanngitsoq
- Sulisut nukittulluinnartuusut isumaqarpunga, taamaattumik pisoq taama amiilaarnartigisoq qanoq malugineqarsimannginnera paasisinnaanngilara. Naak pisoq tujorminarlunilu amiilaarnaraluaqisoq imminut oqarfigaanga pisoq akuerisariaqarlugu.
Ivaaqqamiititaqarnini iluaraa, aamma saniatigut allanik periarfissaqanngilaq. Allamimi qitornami pisariaqartitai aallaavigalugit paarineqarsinnaanngilaq.
- Paniga allamut nuussagaluarpat nalulluinnarpara sumut nuutsitaassagaluarnersoq. Panimma pisariaqartitai naalaartariaqarpakka, maannakkumullu pisariaqartitai aallaavigalugit Ivaaqqami najugaqartariaqarpoq. Ivaaqqamut tatiginninnerma uterteqqinnissaa uterteqqittariaqarpara, Suffi Markussen oqarpoq.
Ikiorserneqarpoq
Isumaginninnermut Aqutsisoqarfiup angajoqqaanut Qaqortumi najugaqanngitsunut ikiorsiipput. Pisoq saqqummereersoq angajoqqaat qitornatik najorniassammassuk angajoqqaajusut Qaqortumukartinneqarput. Aamma ikiorserneqarnissamut periarfissinneqarput.
- Taamaaliortoqarnera qujamasuutigeqaara, arlalitsigut iluaqutaaqaaq. Suliaq pillugu sulinerat naammagisimaaqaara.
Tarnip pissusaanik arfineq pingasoriarluni quleriarluniluunniit oqaloqateqarnissamik angajoqqaajusut pisariaqartitaat aallaavigalugit periarfissinneqarput.
