Ivaaqqami najugaqarsimasumut angajoqqaaq: Suliat amerlanerit oqartussat ilisimasaqarfigaat
Inuit innarluuteqartut ulloq unnuarlu angerlarsimaffianni Ivaaqqami kinguaassiuutitigut atornerluisoqarsimaneranik suliaq ingerlanneqartup malitsigisaanik angajoqqaaq alla oqaluttuarpoq panini ulloq unnuarlu angerlarsimaffimmi najugaqarsimasoq pillugu arlalinnik suliassanngortitsinikuusimalluni. Persuttaasimanermut pasitsaassinermi oqartussat iliuuseqanngippallaarsimasut, taanna isumaqarpoq.
Arnaq 23-nik ukiulik qaammatini qulingiluani naartummat, qanoq ililluni paasineqanngitsoorsinnaava? Qaqortumi Ivaaqqami suliaq maannakkorpiaq ingerlanneqartoq pillugu atuaraanni apeqquterpassuit ilaat taamaappoq.
Ivaaqqami najugaqarsimasumut anaanaasoq aamma imminut aperisimavoq qanoq ililluni pania 2016-imi nissumigut napeqqasoq ullut 16-it paasineqarsimanngitsoq qisuariartoqaranilu. Pania kianikkaluttuinnarmat aatsaat qisuariartoqarpoq.
Aaqqissuisoqarfiup suliaq pillugu allagaatigineqartut takuai. Suliamut tunngatillugu paniusumut persuttaasoqarsimasinnaanera atornerluisoqarsimasinnaaneralu pasilliisoqarneranut tunngatillugu ulloq unnuarlu angerlarsimaffimmut, kommunimut aamma namminersorlutik oqartussanut allakkatigut attaveqatigiinnerit aaqqissuisoqarfiup atuarpai.
Anaanaasoq kinaassutsiminik isertuussiumavoq panimi kinaassusaa illersorumallugu. Taannali isumaqarpoq suliaq oqartussanit pimoorunneqarsimanngitsoq, najugaqartumullu persuttaasoqarsimasinnaaneranik atornerluisoqarsimasinnaaneranillu pasitsaassinermi nalunaartussaatitaaneq ulloq unnuarlu angerlarsimaffimmit malinneqarsimanngitsoq.
Sukaterisoqassasoq
Isumaginninnermut aqutsisoqarfimmi pisortaq, Helene Berthelsen, Sermitsiaq.AG-mut oqarpoq suliaq maanna allaaserineqartoq ilisimasaqarfiginagu ukiuni pingasut matuma siorna aatsaat pisortanngorami. Taannali erseqqissaavoq suliat qangali suliassanngortinneqarsimasut pisussaanerit malillugit eqqortumik suliarineqarsimassasut tatigalugu, soorlu maanna sulisut aamma taama iliortut.
- Maanna suliamut tunngatillugu sukaterivugut, qularinngilaralu aamma taamani taama iliortoqarsimassasoq taama pisoqaqqinnginnissaa anguniarlugu.
Paniusumut annersaasoqarsimasinnaaneranik taamani pasitsaassisoqarsimavoq, anaanaasullu panimmi misissorluarneqarnissaa piumasarisarsimagaluarpaa.
Suliaq 2016-imi pisoq pillugu Ivaaqqami pisortat suliamut tunngatillugu allagaataanni allassimavoq paniusoq nissuminik napisimalluni ullut 16-it siniffimmi innangasimasoq, niua naffakoq paasineqarani. Paniusoq kissarninikkaluttuinnarmat aatsaat paasineqarsimavoq. Ulloq unnuarlu angerlarsimaffimmit nassuiaatigineqarsimavoq paniusoq siniffimmit nakkalersoq sulisumit ikiorniarneqarsimasoq, tassanilu niua napisimasoq.
Anaanaasup qanoq pisoqarsimaneranik nassuiaat suli upperinngilaa.
Pasitsaassinini pillugu suliamik ingerlatsinissaanik innersuunneqarsimanngilaq
Anaanaasup eqqumiigisimavaa suliaq ulloq unnuarlu angerlarsimaffimmit nalunaarutigineqarsimanngimmat. Anaanaasoq aamma siornatigut politiinut suliassanngortitsiniarsimagaluarpoq panini tungujorneqarmat nujaarunnersaqaleriasaarsimammallu. Taamalli iliussanngitsoq ulloq unnuarlu angerlarsimaffimmi forstanderimit ilisimatinneqarsimavoq. Tunngavilersuutigineqarsimavoq "sulisoq pineqartoq soraarniuteqarsimammat".
Suliani pereersimasuni oqartussat qanoq iliorsimasinnaagaluarneri, maannalu pisumi Ivaaqqami najugaqartut toqqissisimanissaat anguniarlugu oqartussat qanoq iliornerusinnaaneri, anaanaasup ilaqutaasullu allap maanna apeqquserpaat.
- Ulloq unnuarlu angerlarsimaffimmi videonik nakkutilliissutinik ikkussuisoqassasoq piumasaraarput, Ivaaqqami najugaqartut allat kinguaassiutitigut atornerlunneqannginnissaat persuttarneqannginnissaallu pillugu. Piumasaraarput ulloq unnuarlu angerlarsimaffiit, kommunit Naalakkersuisullu, najugaqartut pisuttaasoqarnerannik kinguaassiutitigullu atornerlunneqarnerannik pasitsaassinermi periusissianik ersarissunik suliaqassasut. Nunatsinni meeqqanut ulloq unnuarlu angerlarsimaffinnut tamanna aamma atuuttariaqarpoq, meeqqammi paaqqutarineqarnissamik pisariaqartitsinerpaapput, kaammattuutigineqarpoq.