Ivaaqqami kinguaassiutitigut atornerluisoqarsimanera pillugu innarluutillit illersuisuat: Nunatsinni aatsaat taama pisoqalinngilaq
Annertuumik innarluuteqartup kinguaassiutitigut atornerlunneqarsimanera innarluutillit illersuisuata annilaassutigaa. Inuit innarluuteqartut kinguaassiutitigut atornerlunneqariaannaanerusut oqaatigaa.
Inuit innarluutillit illersuisuata, Anja Hynne Nielsen, annertuumik innarluuteqartup kinguaassiutitigut atornerlunneqarsimanera tupassutigaa. Pineqartoq naartunersoq malugineqarsimanngilaq, tallimanngormallu ernilluni.
- Tusaqqaarakku upperiuminaatseqqaarpara ilumut taama pisoqarsimasoq. Pisoq alianartorujussuuvoq. Tiliumi pisoq attortissutigeqaarput, Sermitsiaq.AG-mut oqarpoq.
Suliaq pillugu sukumiisumik oqaaseqarsinnaanani oqarpoq, maannalu pisoq politiinit misissorneqaleruttorpoq. Aatsaalli innarluutilimmik kinguaassiutitigut atornerluisoqanngitsoq oqaatigaa.
- Suliamik assingusumik ajoraluartumik aatsaat siumuilinngilagut. Ulloq unnuarlu angerlarsimaffinni najugaqartut inunnit allanit sanilliullugu imminnut illersoriarsinnaanerat killeqarnerusarpoq, taamaattumik timikkut tarnikkulluunniit atornerlunneqariaannaanerupput.
Saaffiginnittorpassuit
Ulloq unnuarlu angerlarsimaffinni najugaqartunik kinguaassiutitigut atornerluisoqarsimanera pissutaalluni 2018-mit pingasoriarluni ingerlariaqqinnissamut ikioqqusunik Tilioq saaffigineqarnikuuvoq. Kisitsilli anginerusinnaavoq, pisortatiguunngitsumimmi aamma assingusunik saaffiginnittoqartarpoq, taamaammat kisitsit anginerusinnaavoq.
- Taamatut saaffigineqartilluta uagutsinnut ingerlateqqinneqartut politiinut tunniuttarpagut, oqartussanullu ernumassutitsinnik allagaqartarluta, Anja Hynne Nielsen oqaluttuarpoq.
Inummut innarluutilimmut pinerluttuliornerummata politiit suliaq naammassiniarlugu misissortaraat naqissuserpaa.
- Innarluutilimmut pinerluttuliornerummat taamaammat aamma sumiginnaasoqarsimavoq, illersorneqarnissamut, innarligaannginnissamut, kinguaassiutitigullu atornerlunneqannginnissaanik pisinnaatitaaffii qaangerneqarput. Taamatut pisoqarsimasussaanngikkaluarpoq.
Eqqugaariaannaanerusut
Inunnut innarluuteqartunut oqartussat akisussaaffeqarnerusut naqissuserpaa.
- Ilisimavarput timikkut tarnikkullu innarluuteqartut, ingammik niviarsiaqqat arnallu eqqartortillugit, atornerlunneqarnissamut marloriaammik pingasoriaammilluunniit eqqorneqariaannaanerusartut.
Taamatut pisoqartillugu suleriaatsit, inatsisit iliuutsillu suut atorneqartassanersut Tiliup Isumaginninnermut Aqutsisoqarfik nalunaajaassasoq piumaffigaa. Tassani ulloq unnuarlu angerlarsimaffiit sukisaarsartarfiillu pillugit nalunaajaasoqarnissaa qinnuigaat. Inuit innarluuteqartut peqatigalugit politiikerit iliuuseqarnissaat Anja Hynne Nielsenip neriuutigaa.
- Ulloq unnuarlu angerlarsimaffinni najugaqartut imminnut illersoriarsinnaaneq ajorput, taamaattumik pitsaanerusumik suleriaaseqartoqartariaqarpoq. Assingusumik pisoqaqqinngilluinnarnissaa anguniarlugu sulissuteqartoqartariaqarpoq - taamatullu pisoqaqqinnginnissaa anguniarlugu aningaasaliisoqartariaqarpoq, suleriaatsillu malinneqarluinnarnissaat aamma qulakkeerneqartariaqarpoq, Anja Hynne Nielsen oqarpoq.