Ivaana Mølgaard 19-inik ukiulik kickboxertarluni ukioq ataasinngulerpaa. Taekwondomik ukiuni arlalinni misilittagaqarluarpoq, Københavnimulli siorna nuukkami kickboxing soqutigisarilerpaa.

Maannalu nunat avannarlerni kickboxernermi 55 kilo ataallugu oqimaassusilinni pissartatut imminut taasinnaalerpoq.

- Nuanneqaaq. Aatsaavissuaq Nordic Openimi peqataavunga, aamma unammisut allat malinnaaffigalugit assut nuannerluinnarpoq, Ivaana Mølgaard ajugaanini pillugu Sermitsiaq.AG-mut oqaluttuarpoq.

Taanna aalajangereerpoq timersuummi suli pitsaanerulerniarluni, unammisartut misilittagaqarnerusut siunissami unammisalerusukkamigit.

Timersuut soqutiginarluartoq

Sverige, Norge aamma Danmark Nordic Openimi peqataatitaqarput, Københavnimi arfininngorneq 23. september ingerlanneqartumi. Ivaana Mølgaardip unammisartut qaffasinnerusumi inissisimasut unammeriaasii assut soqutigilluinnarlugit oqaluttuarpoq.

- Norskit aamma svenskit unammeriaasii assut soqutiginarluinnarput. Taakku qaffasinnerusumi, tassa K-1-imi unammipput. Taama unammisalernissara siunniuppara, immaqa ukiut pingasut qaangiuppata disciplinimi tassani unammisalersinnaavunga, Ivaana Mølgaard oqarpoq.

Taanna oqaluttuarpoq kickboxingimi taekwondomiit periarfissaqarnerusoq. Assersuuteqarpoq tillussisarnerit tukersisarnerillu assigiinnginnerusut kickboxingimi atorneqarsinnaasut.

Nunanut allanut unammisartunngorusuttoq

- Taekwondortareerama timersuummi teknikkit allat inerisarsinnaaneri nuannareqaara. Danmarkimi nunanut allanut unammisartunngornissara takorloorpara, qaffasinnerusumi unammisartunngornissara takorloorakku, Ivaana Mølgaard oqarpoq.

Taanna maanna ilinniarnertuunngorniarpoq, kickboxertarninili ingerlatiinnarumallugu Danmarkimi ilinniagaqarnissani takorluulereerpaa.