Ivaana Atlantikup avannaani ilinniarnertuunngorniarnissaminut annertuumik legatinnattoq

15-inik ukiulik Ivaana Olsen Rasmussen Sisimiuneersoq BankNordikimit 150.000 koruunit nalilimmik legatinnappoq.

Savalimmiuni, Danmarkimim Islandimi aamma Kalaallit Nunaanni atuarluni ilinniarnertuunngorsinnaaneranik tamanna isumaqarpoq. Inuusuttut allat 31-t Atlantikup avannaaneersut peqatigalugit Nordatlantisk Gymnasieklassemi atuassaaq.

- BankNordikimit legatinnannera assorsuaq qujamasuutigaara. Legatinnattussanngorama Nordatlantisk Gymnasieklasse ilinniarfigisinnaalerpara, ilinniarfik nutaaq pissanganartorlu, nunani avannarlerni nunanit assigiinngitsunit sisamanit peqataaffigineqartoq. Nunat avannarliit allat tikillugillu piorsarsimassusaat misilittagaqarfigisinnaalerpara, ilinniagassanik soqutigisannik aallussiutigalunga, taanna BankNordikimit tusagassiuutinut nalunaarut naapertorlugu taama oqarpoq.

Danmarkimi aallarteriarluni – Kalaallit Nunaanni naammassissaaq

- Aasaanerani atuanngiffiup kingorna Ivaana atuaqatissanilu Nordatlantisk Gymnasieklasse atualerfigissavaat, 1.g Danmarkimi ingerlanneqassaaq, kingorna 2.g-mi ukiup affaa Savalimmiuneeriarlutik ukiup affaa Islandimiissapput. Ukiut pingajussaanni atuaqatigiit ilinniarnertik Kalaallit Nunaanni ingerlatissavaat, tassanilu naammassissallutik.

- Inuusuttut ilinniagaqarnissaannut kajumissaarusuppagut, tamanna suliffissanik periarfissiissammat, kiisalu inuiaat ilinniarluarsimasuuppata tamanna inuiaqatigiinnut tamanut iluaqutaassammat. Legatimik tunniussilluta ilinniartumut oqilisaarusuppugut, nerisassanut, ineqarnermut, kiisalu nunat taakku sisamat akornanni angalanissanut aningaasartuutissanut tapiilluta – nunani avannarlerni ilinniarnertuunngorniarnerminik naammassinninnissaanut tapersersorlugu, René Sørensen, BankNordikimi inunnut atuisunut siunnersortinut pisortaasoq oqarpoq.