Ittoqqortoormiit: Qilalukkanik qernertanik pisasseeqqinnissaq misissorneqartoq
Aalisarnermut piniarnermullu naalakkersuisoq, Jens Immanuelsen, Inatsisartuni pingasunngornermi apeqqarissaarfigineqarnermini ilisimatitsivoq Ittoqqortoormiini qernertanik qilalugartasseeqqinnissamut misissuisoqartoq.
Ittoqqortoormiini piniartut qilalukkat qernertat ukiumut pisassatik 50-iusut tamakkerlugit pisarereerpaat. Naalakkersuisut ippassaq taama ilisimatitsipput.
Inatsisartulli aalisarnermut piniarnermullu naalakkersuisumut apeqqarissaarnerata nalaanni, naalakkersuisoq Jens Immanuelsen (S) ilisimatitsivoq illoqarfimmi pineqartumi pisarineqarsimasut nalunaarsorneqarneri tamakkerlugit ippassaq tiguneqarsimasut.
- Naalakkersuisoqarfiup maanna misissorpaa Ittoqqortoormiini qernertanik qilalukkanik pisasseeqqittoqarsinnaanersoq, apeqqarissaarnerup nalaani Jens Immanuelsen ilisimatitsivoq.
Akissuteqarnermini neriorsuutiginngilaa qilalukkat qernertat pisassarineqartut amerlineqarnissaat.
Partii Naleqqameersup Jens Napaattuup apeqqutigaa Ittoqqortoormiini qilalukkat qernertat pisassat amerlineqassanersut.
Siumut, Partii Naleraq, Atassut aamma Nunatta Qitornai qernertanik qilalugartasseeqqinnissamik ataatsimoorlutik piumasaqarnikuupput.
Tunumi qernertanik qilalugaqarpoq, qaqortanilli qilalugaqarnani.
