Skip to main content

Ittoqqortoormiini uummaarissumik oqallipput

Apeqqarissaartoqarluarlunilu najuuttoqarluarpoq borgmester Asii Chemnitz Narup (IA) kommunalbestyrelsimullu ilaasortaq Charlotte Pike (IA) innuttaasunik paasissutissiillutik ataatsimiititsimmata

Taarsiarsaalersoq Ittoqqortoormiini innuttaasut amerligaluttuinnartut atuarfimmukaapput. Illoqarfiup inuinit 400-nit 50-it missaanniittut ataatsimiinnermut takkupput, tassani paasissutissiilluni ataatsimiititsinermi Kommuneqarfik Sermersuup 2016-imut missingersuutaa oqaluuserineqassalluni.

Ukioq manna Ittoqqortoormiinut kommunip pilersaarutai makkua borgmesterimit nassuiaateqarfigineqarput:

Siunertalimmut inissianut inissialiornermullu 3 millioner koruunit missarpiaat.
Eqqaavissuup salinneqarnerata nanginneqarneranut 1 million koruunit.
Illoqarfimmi utoqqaat illuata nutarterneqarnissaata allineqarnissaatalu pilersaarusiorneqarneranut millionip affai.
Pinnguartarfimmut nutaamut 125.000 koruunit.
9. klassimi atuartut qallunaatut piginnaasamik nammineersinnaanermillu nukittorsarnissaannut Aalborgimi atuarfimmiinnissaannut 250.000 koruunit.
Illoqarfimmi amuartaatip nutaap ingerlanneranut aserfallatsaalineranullu 250.000 koruunit.

Apeqqarissaarluarput

Innuttaasut peqataasorpassuit illoqarfimmi pissutsinut borgmesterimut Charlotte Pikemullu (IA) apeqqutissarpassuaqarput.

Ilaatigut apeqqutigineqarput tunitsivik sivisuumik utaqqineqarsimasoq aammalu Ittoqqortoormiit eqqaani anngajaamik mittarfiliornissamut periarfissat.

– Nalunngilara Ittoqqortoormiit eqqaani mittarfeqalernissaa sivisuumik kissaatigineqarsimasoq. Soorunami aamma uanga neriuutigaara qanittukkut tamanna piumaartoq. Namminersorlutilli Oqartussat aalajangigassaraat Ittoqqortoormiinut qanoq aaqqiissuteqartoqassanersoq, borgmesteri oqarpoq.

Tunitsivik pitsaanerusoq tamarmik kissaatigaat

Apeqquteqartut amerlasuut tunitsivimmik ammaaqqittoqaqqinnissaanik pilersaarutit annertunerusumik tusarfigerusuppaat, piniartut umimmaat neqaannik qilalukkallu neqqaannik, nunap sinnerani pisiniarfinni tuniniarneqartussanik, tunitsivigisinnaasaat.

Tamatumanissaaq borgmesterip innuttaasut neriorsuuteqarfigisinnaanngilai.

– Soorunami tunitsiviup qanittukkut ammaqqinneqarnissaa ilissitulli soqutigitigaara - aaqqiissutissarsiornerlu suli sulissutigaarput. Nalunngilarput nioqqutissaatisi Kalaallit Nunaata sinnerata soqutigigai, tunitsiveqarnerlu Ittoqqortoormiinut tunissutaassagaluarpoq. Tamanna illoqarfimmi suliffinnik pilersitsissaaq akileraarutitigullu isertitaqartitsilluassalluni, Asii Chemnitz Narup (IA) oqarpoq.

Nereqatigiinnermik naggaserneqarpoq

Tamatuma saniatigut oqaluuserineqarpoq namminersorlutik oqartussat kommuni suleqatigalugu illoqarfimmi peqqinnissaqarfik qanoq isillutik pitsaanerusumik siuarsarsinnaagaat. paasissutissiillunilu ataatsimiititsinermi aamma eqqaaneqarpoq INI-p inissiaataasa kommunimit tiguneqarnissaat, maanna Sermersuup inissiaatileqatigiiffianit Iserit tiguneqartussanngortut.

Paasissutissiilluni ataatsimiititsineq nereqatigiinnermik naggaserneqarpoq, tassanilu borgmester Asii Chemnitz Narupip kommunalbestyrelsimullu ilaasortap Charlotte Pikep takkuttorpassuit umimmaap neqaanik siatamik nereqartigaat.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER