Ittoqqortoormiini qilalukkanik qernertanik pisassiissutit tamakkerneqartut
Ittoqqortoormiit immikkut pisassinneqarsimanngillat - qernertanillu qilalugarniarneq maanna unitsinneqassalluni
Ittoqqortoormiini qilalukkat qernertat 50-it pisarineqartussatut pisassiissutigineqarsimasut maanna tamakkerneqareerput, taamaalilluni qilalukkanik qernertanik piniartoqaqqissanngilaq. Aalisarnermut Piniarnermullu Naalakkersuisoqarfik taamatut nalunaaruteqarpoq. Pisassiissutit tamakkerneqaannarsimanngillat, pisassiissutilli sinnerlugit pisaqartoqarsimalluni.
- Ajoraluartumik ataatsimik sinniisoqarsimavoq, aappaagu pisassiissutinit taanna ilanngaatigineqassaaq, Naalakkersuisoqarfik allappoq.
Naalakkersuisut sapaatip akunnerata siuliani aqutsiveqarfiit arlallit immikkut qernertanik qilalugartassippaat, Ittoqqortoormiilli tassunga atatillugu pisasseqqinneqarani.
- Aalisarnermut Piniarnermut Nunalerinermullu Naalakkersuisoqarfiup nalunaarutigisinnaavaa Ittoqqortoormiini 2019-imi tikaagullittassat suli marlunnik sinneqarmata, taakkulu suli piniarneqarsinnaallutik. Taassuma saniatigut Tunu tamakkerlugu aavertassat suli 20-nik sinneqarput, tusagassiorfinnut nalunaarummi taamatut allassimasoqarpoq.