Ittoqqortoormiini poorskimi pikialaartitsinerit aallarteqqinneqartut
Ittoqqortoormiini poorskimi pikialaartitsinerit ukiuni marlunni uninngatinneqareersimallutik aallartinneqaqqippata skakkerneq, cirkusimi takutitsineq, nipilersorneq assilialiornerlu ukioq manna pilersaarutinut ilaatinneqassapput.
Skakkertartut peqatigiiffiat Hrókurinn Ittoqqortoormiini poorskimi pikialaartitsinermik ukiuni marlunni uninngasoqareersorlu aallartitseqqippoq. Ittoqqortoormiini innuttaasut skakkernermik, cirkusimi takutitsinermik, nipilersornermik assilialiornermillu misiliinissamut periarfissinneqassapput.
Taama skakkertartut peqatigiiffiat Hrókurinn tusagassiuutitigut nalunaarummi paasissutissiivoq.
Hrókurinn 2007-imiilli 2019-ip tungaanut poorskimi pikialaartitsinermik aaqqissuussisarsimavoq. Covid-19 tassungalu atatillugu killilersuinerit pissutigalugu skakkertartut peqatigiiffiat 2020-mi aamma 2021-mi poorskimi pikialaartitsinernik aaqqissuussisinnaasimanngilaq.
- Poorskimi pikialaartitsinerup siunertaa pingaarneq tassaavoq meeqqanut inuusuttunullu Ittoqqortoormiinilu najugaqartunut tamanut nuannaartitsinissaq. Skakkertartut peqatigiiffiat Hrókurinn ukiut 15-it matuma siorna Ittoqqortoormiineeqqaarpoq maannalu illoqarfik Kalaallit Nunaanni qaffasissumik skakkerfiusartutut isigineqarpoq. Illoqarfik taanna illoqarfinni aamma nanoqarnerpaasarpoq, Hrafn Jökulsson, poorskimi pikialaartitsinermut ataqatigiissaarisuusoq, oqarpoq.
Islandimit tikeraat
Islandimit peqataasut tassaapput Axel Diego, cirkusimi takutitsisartoq, Linus Orri Cederborg, nipilersortartoq, skakkertartoq cirkusimilu takutitsisartoq aamm Amerikamiu Sage Sovereign, cirkusimi takutitsisartut ilisimaneqartorujussuaq.
Poorskimi pikialaartitsineq apriilip 11-ani 20-anut sivisussuseqarpoq, pisussatullu pilersaarutaallutik amerlasuukkuutaarluni skakkerneq, Ittoqqortoormiini skakkimik pissartanngorniunnerit, cirkusimik ilinniarfik, eqqumiitsulianik suliaqarfik tusarnaartitsinerlu.
Poorskimi pikialaartitsinermut aningaasaliisuupput Kommuneqarfik Sermersooq, Norlandair, Air Greenland, Tusass aamma Islandimi ingerlatsisut arlallit kiisalu Islandimi Fulltingi Kalaallit Nunaannilu ikiuiniaqatigiinnermik suliniaqatigiiffiit.
Ittoqqortoormiini ulluni 11.-20. apriilimi poorskimi pikialaartitsineq iluatsilluarpoq. Aaqqissuussineq coronamik nunarsuarmi nappaalanersuaq pissutigalugu ukiuni marlunni uninngatinneqarsimavoq.