peqqinnisamik sullissineq
Ittoqqortoormiini napparsimasut pilertornerusumik peqqinnissakkut sullinneqartalissasut
Tunup illoqarfiani napparsimasut siunissami Islandimut Danmarkimulluunniit misissortikkiartorlutillu katsorsartikkiartortalissapput.
Siunissami napparsimasut pilertornerusumik katsorsarneqarlutillu peqqinnissakkut pitsaanerusumik sullinneqartalissapput.
Napparsimasummi siunissami Islandimut Danmarkimulluunniit nakorsanik misissortikkiartortalissapput.
- Ittoqqortoormiuni napparsimasunut katsorsartinnissamik misissortinnissamillu neqeroorutit allannguuteqassanngillat, taamaallaalli nakorsanit Islandimeersunit Danmarkimeersunilluunniit sullinneqalissallutik. Aammattaaq napparsimasut kissaatigippassuk kalaallisut nutserisoqarsinnaapput, Namminersorlutik Oqartussat tusagassiuutinut nalunaarummi allapput.
Islandimi ataqatigiissaarisoq nunatsinneersoq Danmarkimi Kalaallit Peqqissartut Angerlarsimaffianni pissutsit assigalugit assersuutigalugu unikkiartorluni aamma/imaluunniit uninngareernermi najugaqarnermut tunngasutigut pilersaarusioqataasassaaq.
Nunatsinni Peqqinnissaqarfiup Islandimi peqqinnissaqarfik 2009-mili suleqatigiinnissamik isumaqatigiissuteqarfigisimagaa, paasissutissiarineqarpoq.
- Isumaqatigiissut ukiuni kingullerni annertusarneqarpoq aalajangersarneqarlunilu, taamaalillunilu aaqqiissut manna tamatuma pissusissamisoortumik ilagalugu, Namminersorlutik Oqartussat oqarput.