Itsarnisarsiorluni assaanerit arlallit kinguartinneqartut

Kalaallit Nunaanni qanganisarsiorluni assaanerit nalinginnaasumik ukioq manna ikinnerupput.

Suliat qanganisarsiorluni assaanerit ikinnerpaamik tallimat coronavirusip nunarsuaq tamakkerlugu tunillaassornera pissutigalugu kinguartinneqarallarsimapput.

Nunatta Katersugaasiviani pisortap tullia katersugaasivilerisorlu, Christian Koch Madsen taama ilisimatitsivoq.

- Nunarsuaq tamakkerlugu tunillaassortoqarnera pissutigalugu itsarnisarsiorluni misissuinerit, itsarnisarsiuunit nunanit allaneersunit peqataaffigineqartussaagaluartut, 2020-mi ingerlanneqartussat unitsinneqarallarput. Suliat kalaallinit ingerlanneqartut kalaalliniillu kisimi peqataaffigineqartut kisimik, akornuserneqaratik ingerlapput. Sanaartornissamut tunngatillugu saliinissamullu tunngatillugu nakkutilleeqqaarnerit aamma eqqorneqarput, ilisimatitsivoq.

Kalaallit Nunaanni ukioq manna suliniutinut qinnuteqarfissaq kingulleq tassaavoq maajip aallaqqaataat, piffissamilu tassani Kalaallit Nunaanni tunillaassortoqarnera pissutigalugu nuna matoreersimavoq. Taamaammat qulakkeerneqarsinnaanngilaq suliniuteqarumallutik pilersaaruteqartut tamarmik qinnuteqaammik nassiussisimanersut.

Kalaallit Nunaatali ammaqqinnera isumaqanngilaq, itsarnisarsiorluni sulinerit pilersaarutaareersut aallartissinnaanngortut:

- Ukiumi piffissaq assaavigisartagarput ingerlalluinnalereerpoq, amerlanerillu atortuminnik nassiussinissaminnut tikinnissaminullu periarfissakippallaalereerput, aamma sulinngiffeqarnissat ilisimatusarfimmilu ilinniarnerup aallarteqqinnissaa eqqarsaatigalugu, Christian Koch Madsen nassuiaavoq.

Nunarsuarmut kingornussassatut allattorsimaffik

Suliniutit anginerusut ilaat, tassa Activating Arctic Heritage, Danmarkip Kalaallit Nunaatalu Katersugaasiviisa suleqataaffigisaat, angallannerup killilersorneqarsimaneranit aamma eqqorneqarpoq.

- 2020-mi sumiiffimmi assaalluni suliaqarnerit, ilisimatusartuni ilinniartuniillu 20-nit peqataaffigineqartussani marlunnit siulleq ingerlanneqartussaagaluarpoq, Christian Koch Madsen oqaluttuarpoq.

Taanna maanna Kujataani Thule kultoori pillugu sumiiffimmi assaalluni suliaqaqataavoq.

Activating Arctic Heritage tassaavoq suliniut annertooq, Aasivissuit-Nipisaat aamma Kujataa pillugu ingerlanneqartoq. Nunatarsuit taakku UNESCO-p nunarsuaq tamakkerlugu kingornussassatut allattorsimaffimmi ilanngunneqarsimapput. Sumiiffimmilu kultoorikkut eriagisassat misissorneqarnissaat nunatta Danmarkillu katersugaasiviisa suleqatigiiffigalugu ukioq manna assaajartortussaagaluarput. Carlsbergfondet suliniut 26,5 milliuunit koruuninik tapiiffigisimavaa.

Ilisimatusartut pingaarnertut ukkatariniarpaat ukiut akullernit ukiut issinnerulerfiusimasut, tassa 14-1800-t akornanni pisimasut. Activating Arctic Heritagemi suliniutit ilagissavaat issittumi inuiaqatigiinnut silap pissusia qanoq sunniuteqarsimanersoq.

Katersugaasivilerisoq oqaluttuarpoq aningaasaateqarfiit paasinnilluartut assaalluni suliat arlallit kinguartinneqartariaqalersimaneri pillugit.