IT-lerinermi immikkut ilisimasalik: Feeriarlutit angalanerni internetimut attaveqaatit akeqanngitsut sianigikkit
Caféni neriniartarfinnilu internetimut attaveqaatit akeqanngitsut salloqittaataasinnaapput, taama Ingeniørforeningen mianersoqqusivoq.
Aasaanerani nunanut allanut feeriarluni angalaniaraanni internetimut attaveqaatit akeqanngitsut sianigisassaapput, tassa tamakku qarasaasianut isissutissarsisartuniit paasissutissanik tillinniarlutik salloqittaataasinnaapput.
Ingeniørforeningenimiit mianersoqqussut taama imaqarpoq.
Pingaartumik caféni neriniartarfinnilu internetimut akeqanngitsumik atuisinnaanerit ilimasuutigineqarsinnaanngitsut pineqarput.
Aamma assersuutitut qarasaasianut isissutissarsisartut hotelip attaveqaataata atiata assinganik atserlugit attaveqaatiliorsinnaapput.
Tamannali ilutigalugu attaveqaatinut atuisinnaanngorniaraanni imminermut paasissutissat tunniunnissaat piumasaqaataasinnaapput.
Isertugaatitit pissarsiariniarlugit attaveqaatit atornerlunneqartarneri takusarpavut – assersuutigalugu mailinnut isissutissat, Ingeniørforeningenimi it-mik sillimaniarnermut ilisimasalik Jørn Guldberg taama oqarpoq.
- Attaveqaatinut attavinikkuit mobilerniit qarasaasiannilluunniit nassiussatit tusarnaarsinnaavaat, paasissutissallu inuup allap kinaassusianik atornerluinermut atorneqarsinnaapput, Jørn Guldberg oqarpoq.
Misissuineq, Userneeds Ingeniørforeningen-imut suliaa, qallunaaniit 2000-nik peqataaffigineqartoq naapertorlugu qallunaat sisamararterutaat feeriami wi-fi qamittaraat.
Kikkut tamarmik smartphoneminni, tablet pc-minni qarasaasiaminnilu feeriannginnerminni wi-fi qamittassagaat Jørn Guldbergip innersuussutigaa.
- Qallunaat amerlanerpaartaasa mobilinik atuisunut atugassarititaq tassaasoq Europami sumiikkaluaraanniluunniit akeqanngitsumik mobili atorlugu attavinissinnaaneq atorpaat, taassuma atornissaa siunnersuut pitsaanerpaajuvoq.
Tele-Post nunani allani
Tele-Postip Europami nunat arlallit isumaqatigiissuteqarfigai, Tusassimillu atuisuugaanni Kalaallit Nunaannituulli internetimik atuineq akeqqatigigaa isummannaarpaat. Nunani ukunani: Danmark, Norge (Svalbard ilanngullugu), Sverige, Finland, Færøerne, Åland, Island, USA, Canada, Tuluit Nunaat Tysklandilu.
- Wi-fi atorniaraanni attaveqaat eqqortuusoq qulakkeerneqartariaqarpoq, tassa hotelini takuneqartartutuulli, Jørn Guldberg oqarpoq.
Aammattaaq ajutuussangaluaraanni feeriannginnermi smartphone-miittuutit, tablet pc-miittuutit qarasaasiamiittuutillu isumannaallisaatitut kopeernissaat innersuussutigaa.