Isummanik paasiniaaneq: Partiit minnerit pillarneqarput - IA anneruvoq
Innuttaasut isumaannik paasiniaanerup inernerisa takutippaat partiit minnerit marluk, tassa Nunatta Qitornai aamma Suleqatigiissitsisut, qinersisartunit pillarneqartut, taakkumi qinigaatitaqanngitsuussagaluarput. IA-p Siumut qaangerpaa, nunatsinnilu partiitut annertut inissisimalerluni.
Inatsisartunut apriilimi qinersereernerup kingorna HS Analysep misissuititsineranit annermit takuneqarsinnaavoq partiit tamarmik sunnerneqassasut qinigaatitaasullu nikerassasut. Taakku saniatigut takuneqarsinnaavoq kikkut Naalakkersuisuni issiasuutitaqalernissaannut Demokraatit aalajangiisooratarsinnaasut.
Nunatta Qitornai Suleqatigiissitsisullu tamarmik ataatsimik qinigaatitaqarunnaassapput Inatsisartuniillu anisariaqassallutik. Qinigaatitaqalernissamulli “naluara”-mik taasisut ikitsuinnaat qinersisorisinnaavaat, qinigaatitaqarsinnaallutillu.
Siumut anguneqartoq
Siumut Inuit Ataqatigiinniit anguneqassaaq, IA qinersisiminit 4,8 procentpointinik amerleriaateqassagami, taamatullu qinersisartut 30, 6 procentiinit qinerneqarluni inatsisartuni qinigaatitaminik marlunnik amerleriaateqassagami. Siumut qinigaatitai ataatsimik amerleriassapput, qinersisartulli 28,7 procentiisa qinissavaat – siuariarneq 1,3 procentpointiussalluni. Partiillu taakku ikaqqatigiinnik qinigaatitaqalissapput, qulinik qinigaatitaqalissagamik.
IA-p apriilimi Inatsisartunut qinersinerup kingorna siuariarnera nutaamik siulittaasutaarsimanermit pissuteqarsinnaavoq, tassami siulittaasuusimasoq Sara Olsvig novembarimi tassanngaannartumik tunuarpoq. Maannalu suleqatissarsiortartoq Múte B. Egede siuttuuvoq, taassumallu Naalakkersuisut siuttussaattut sulinini ingerlappaa.
Demokraatit siuariaqqittut
Demokraatit qinersinermi kingullermi siuariangaatsiarput, Niels Thomsen taajuunneqarnerpaalluni, kingorna taanna partiimi siulittaasunngorpoq. Partii naalakkersuisunut tapersiisutut inissisimagaluartoq suli siuariaateqaqqissapput. Demokraatit arfinilinnik maanna qinigaatitaqartut, arfineq-marlunnik qinigaatitaqalissapput.
Partii Naleraq, ministeriunerup Lars Løkke Rasmussenimut mittarfissuit pillugit isumaqatigiissuteqartoqarnera pissutigitillugu septembarimi naalakkersuisoqatigiinnit aneriasaartoq, qinersisartunit pillarneqassaaq pingasunillu qinigaatitaqalerluni – qinigaatitaasut ullumikkornit ataatsimik ikileriarlutik. Partiip qinersinermut kingullermut sanilliullugu qinerneqannginnerunera 3,3 procentpointiuvoq.
Innuttaasut isumaannik paasiniaaneq piviusunngussagaluarpat Atassut, maanna naalakkersuisoqatigiinni issiaqataasoq, ataasiinnarmik qinigaatitaqalissaaq.
Aalajangiisuusinnaasut
Innuttaasulli isumaannik misissuineq aalajangiisuusinnaasumik imaqarpoq, aperineqartummi pingajorarterutaat sinnerlugit ullumikkut qinersissagunik kikkunnik taasissanerlutik aperineqaramik “naluara”-mik akisimapput.
Paasisat:
- Misissuineq nutaarsiassaqartitsiviup Sermitsiaq.AG-p imissineratigut HS Analysemit suliarineqarpoq, tassani innuttaasut 18-leereersimasut oqarasuaatikkut apersorneqarlutik.
- Misissuinermi inuit katillugit 712-it peqataapput, misissuinerlu decembarimi ingerlanneqarluni. Nalorninaataasoq 2,7 procentimut uuttuunneqarpoq, eqquussinnaaneralu 95 procentiulluni.
- Misissuineq suiaassusermik, najugarisamik (illoqarfik/nunaqarfi) suminngaanneertuunermik ukiunullu tunngatillugu amerlaqatigiissaarivoq.
Partiit annerit pingasut siuttuinit, Kim Kielsen (S), Niels Thomsen (D) aamma Múte B. Egedemit (IA) innuttaasut isumaannik misissuineq pillugu apersuinerit aviisimi Sermitsiami atuarsinnaavatit – aviisi uani pissarsiarisinnaavat: