Isummamik allannguineq: Paragraffi akerlerineqartoq allanngortinneqarpoq
Naalakkersuisut inatsisissatut siunnersuut Inatsisartut pingasunngorpat suliariniagaat allanngortippaat. Politiit eqqartuussiviit aqqutigeqqaarnagit angerlarsimaffinnut isertalernissaraluat taamaatiinnarneqarpoq.
Inatsisartut inatsisissatut siunnersuut, oqartussanik coronap tuniluunneranik unitsitsiniarlutik iliuuseqarnissamut piginnaatitsisoq pingasunngornermi suliarissavaat.
Siunnersuummi politiit angerlarsimaffimmi inuit amerlavallaat katersuussimanersut misissorniarlugu angerlarsimaffimmut isersinnaatinneqarput.
Inatsisissatut siunnersuummi immikkoortortaq taanna maanna allanngortinneqarpoq, Naalakkersuisut inatseqarnermut allaffiat Sermitsiaq,.AG-mut ilisimatitsivoq.
Siunnersuutip paragraf 6, imm. 2 erseqqissarneqarpoq, tassani poligiit ininik sumiiffinnillu misissuisinnaatitaanerannut angerlarsimaffiit ilaatinneqanngillat, allaffimmit ilisimatitsissutigineqarpoq.
Inatsisissatut siunnersuutip allannguutaa marlunngorpat Inatsisartunut nassiunneqassaaq. Partiit arlallit inatsiissatut siunnersuummik tapersersuissagunik paragraffimik allanngueqqusisimapput.